Elimizdegi jekelegen sýdıalardyń kásiptik deńgeıi talapqa saı emes - Prezıdent
ASTANA. Qarashanyń 18-i. QazAqparat /Aıdar Ospanalıev/ - Elimizdegi jekelegen sýdıalardyń kásiptik deńgeıi talapqa saı emes jáne olar moral, etıka sııaqty máselelerdi de nazardan tys qaldyrǵan.
Bul týraly búgin Elbasy Nursultan Nazarbaev Astanada ótip jatqan Qazaqstan Respýblıkasy sýdıalarynyń V sezinde málim etti, dep habarlaıdy QazAqparat.
Sezde sot jumysynyń birqatar máselelerge toqtalǵan Elbasy, «sot qyzmetine qatysty basty problemalardyń biri ádil sot sheshimderin qamtamasyz etýge qatysty bolyp otyr. Atap aıtqanda, sot qyzmetinde shym-shytyryq túsiniksiz jaıttar kóp, sondaı-aq onda zańǵa qarsy áreketterge de jol beriletin kezder bolady. Taǵy bir másele, sot óndirisiniń qajetti deńgeıde jetilmegendigine qatysty. Qazaqstan sotynyń qanshalyqty ádil bolatyndyǵy osy óndiris jumystaryna baılanysty. Sondaı-aq sot sheshimderiniń oryndalý deńgeı men sapasy da osy saladaǵy ózekti máselelerdiń birine aınalyp otyr. Sot organynyń bedeli men onyń qabilettiligi osy sheshimderdiń oryndalýyna baılanysty emes pe», dedi Prezıdent sot salasy qyzmetkerlerine qaratyp.
Sondaı-aq Memleket basshysynyń sózine qaraǵanda, sot salasyndaǵy úlken problemalardyń biri zańnamalardyń jaǵdaıymen baılanysty. Qazirgi tańda sot salasyndaǵy úlken daý týdyratyn sharttardyń biri - qoldanystaǵy zańnamalardaǵy kemshilikter. «Kórip otyrǵandaryńyzdaı, sot júıesinde áli sheshilmegen problemalar jetkilikti. Oǵan kóptegen mysaldar keltirýge bolady. Azamattar sot qyzmetindegi kemshilikterge kóp shaǵymdanady. Sondyqtan búgingi jıynda osy másele boıynsha ashyq ta júıeli áńgime qozǵalady degen oıdamyn. Sizder osy aıtylǵan kemshilikterdiń túzeý joldaryn tabady degen úmittemin», dedi Prezıdent.
