Elimizdegi jas otbasylardyń 15 paıyzy bala súıe almaıdy
ALMATY. QAZAQPARAT - Almatyda Avstrııa, Lıtva, Polsha men Reseıden kelgen mamandar bedeýlik məseleni sheshý úshin bas qospaq. Adamnyń reprodýktıvtik densaýlyǵy jaıyndaǵy forým 2-qarashada Ǵylymı ýrologııa ortalyǵynyń akademık B.O.Jarbosynovty eske alýǵa oraı uıymdastyrylady, dep habarlaıdy QazAqparat tilshisi.
Mamandardyń aıtýynsha, Qazaqstanda jas otbasylardyń 15 paıyzy bala súıe almaıdy. Statıstıka boıynsha, árbir altynshy erli-zaıypty bala kóterýde qıyndyqtardy bastan ótkeredi.
Kúrdeli demografııalyq jaǵdaıdy retteý - Qazaqstannyń zamanaýı memlekettik áleýmettik saıasatynyń basty mindetteriniń biri. «Qazaqstan-2030» strategııasynda QR Prezıdenti Nursultan Nazarbaev ulttyq qaýipsizdiktiń basym baǵyttarynyń qataryna kúshti demografııalyq saıasatty engizý qajettigin basa aıtty.
Eýropalyq ýrologtar qaýymdastyǵy derekterine saı, Qazaqstanda otbasylyq juptardyń 25 paıyzy erli-zaıyptylyq ómirdiń birinshi jylynda bala kótermeıdi. Olardyń 15 paıyzy bedeýlikke qarsy emdelse, al 5 paıyzy balasyz qalady. Árbir altynshy jup bala kóterýde qıyndyqtarǵa tap bolady.
«Bedeýlikke juptardyń bireýiniń nemese erli-zaıyptylardyń ekeýiniń de reprodýktıvtik qyzmetiniń buzylýy sebep bolýy múmkin. Buryn balasyzdyq máselesine áıelderdiń bedeýligi sebep dep eseptelip kelse, búginde mamandardyń pikirinshe, osyndaı jaǵdaılardyń 45 paıyzyn erkekterdiń bedeýlik faktory qurap otyr. Balasyz júrgen juptardyń teń jartysyna jýyǵy er adamdardyń uryqtylyǵynyń buzylýynan sábı súıe almaı otyr. Sońǵy jyldary álemde er adamdardyń reprodýktıvtik densaýlyǵy aıtarlyqtaı nasharlap barady. Oǵan ekologııanyń nasharlyǵy, qozǵalyssyz uzaq ýaqyt otyrý, únemi sharshaǵandyq sezimi, kesh neke qurý, retsiz jynystyq qatynas, óz betinshe emdelý yqpal etip otyr. Al, erlerdiń bedeýliginiń sebepteri kóp. Olardyń biri erektıldi dısfýntskııa (belsizdik). Áıelderdiń reprodýktıvtik densaýlyǵy alańdaýshylyq týdyryp otyr. Ókinishke oraı, búginde bedeý áıelder men er adamdardyń sany shamamen birdeı. Ne isteý kerek? Dárigerlerge qaralǵan jaǵdaıda, olardyń kómegi qanshalyqty tıimdi? Bul máseleni sheshý úshin keshendi áreket, ıaǵnı, ýrologtar, andrologtar, reprodýktologtar men gınekologtar tárizdi mamandardyń birlesip jumys isteýi mańyzdy. Sondyqtan, alys jaqyn shetelden mamandardy shaqyryp, təjirıbe almasyp jatyrmyz»,- dedi «Akademık B.Ý. Jarbosynov atyndaǵy Ýrologııa ǵylymı ortalyǵy» AQ andrologııa bólimshesiniń meńgerýshisi, professor Marat Maqajanov.
Atalǵan forýmda erler men áıelderdiń reprodýktıvtik densaýlyǵyn qorǵaý boıynsha mamandar men mamandyqtardyń pánaralyq sımbıozyna, sonymen birge medıtsınalyq qyzmet kórsetýdiń sapasyn arttyrýǵa jol ashylady.
Halyqaralyq mamandar er adamdarǵa kómekshi reprodýktıvtik tehnologııalardy qoldaný, erlerdiń bedeýligine zerthanalyq dıagnostıka júrgizýdiń genetıkalyq aspektileri men jańashyldyǵy, ýrologııada dári-dármektik terapııaǵa qol jetkizý, qýyqasty bezi adenomasyn emdeý ınnovatsııasy, zamanaýı shaǵyn ınvazııalyq ýrologııa, plastıkalyq ýrologııa taqyrybyndaǵy təjirıbelerimen bólispek.
