Elimizdegi jalǵyz qazaq tildi sport basylymy jabylyp qalýy múmkin - depýtat
ASTANA. QazAqparat - Parlament Májilisiniń depýtaty Jambyl Ahmetbekov QR Aqparat jáne kommýnıkatsııalar mınıstri Dáýren Abaevtan elimizdegi birden-bir qazaq tildi gazet «Qazaq sporty» basylymyn qoldaýdy surady, dep habarlaıdy QazAqparat tilshisi.
Mınıstrge depýtattyq saýal joldaǵan májilismen qazirgi «Qazaq sporty» (burynǵy «Sport» gazeti) men «Sport» gazeti eki tilde bólek shyǵatyn Qazaqstandaǵy tuńǵysh sport basylymdary ekenin atap ótti.
«Tarıhy 1959 jyldyń 1 qańtarynan bastalatyn bul basylymdarǵa 2019 jyly alpys jyl tolady. Kezinde qazaq sportynyń kósh basynda turǵan Nurmuhanov, Aıhanov, Segizbaev, Qonaqbaev, Úshkempirov sekildi jáne búgin de Qazaqstannyń álemge tanytyp otyrǵan myńdaǵan sańlaqtarymyzdyń jeńisin súıinshileı habarlaǵan osy - qos basylym», - dedi depýtat.
Onyń aıtýynsha, 2014 jyly gazettiń aqparattyq-saraptamalyq ekspedıtsııasy «Nur Otan» partııasymen birlese otyryp, búkil respýblıka aýmaǵyna issaparǵa shyǵyp, «Deni saýdyń - jany saý» atty dóńgelek ústel ótkizgen. 2020 jylǵa deıin el halqynyń 30 paıyzyn sportqa tartý týraly Prezıdent tapsyrmasyna oraı oblys ákimderi arasynda «Sportqa qalaısyń ákim» atty baıqaý, «Sportqa qamqorshy ákim», «Sportshy ákim» atalymy boıynsha reıtıng ázirlegen.
«Al qazaq tilinde «Qazaq sportynan» basqa basylym ataýly joq. Orys tildi basylymdar onsyz da kóp. Reseıden keletin «Sovetskıı sport», «Sport Ekspress» sekildi kóptegen basylymdar jetip artylady. Sol sııaqty «Pro sport» ta solardyń bir kóshirmesi. Al «Qazaq sporty» respýblıkada qazaq sportynyń kúıin kúıttep júrgen birden-bir basylym», - dedi Jambyl Ahmetbekov.
Barlyq merzimdi buqaralyq aqparat quraldary jeke qoldarǵa ótken kezde respýblıkalyq sport vedomstvosynyń qol astynda bolyp kelgen bul basylymdarǵa «Alataý baspa» polıgrafııa korporatsııasy quryltaıshy atanǵan.
«Búgingi kúnge deıin qal-qadirinshe qarjylandyrylyp keledi. Biraq qazaqsha jáne oryssha eki gazetti qosqanda 8 betten, 16 bettik aptasyna bir ret toqtaýsyz shyǵaryp turý ońaı emes. Óte kóp qarajatty qajet etedi. Eger qazaq sportynyń alpys jyldyq tarıhy bar basylymynyń jabylyp qalý qaýpi tónip turǵandyqtan, sizden kómek kútip, qoldaýyńyzdy suraımyz», - dedi Abaevqa arnaǵan saýalyn aıaqtaǵan depýtat.
foto:imenno.ru
