Elimizdegi zeınetaqy shottarynda 12 trln teńge jatyr

NUR-SULTAN. QazAqparat - 2022 jyldyń 1 maýsymyndaǵy jaǵdaı boıynsha Biryńǵaı jınaqtaýshy zeınetaqy qory salymshylarynyń shottarynda 12,8 trln teńge jınaqtaldy. Bul týraly atalǵan qordyń baspasóz qyzmetinen málim boldy, dep habarlaıdy QazAqparat tilshisi.

«Zeınetaqy jınaqtarynyń negizgi bóligi mindetti zeınetaqy jarnalary (MZJ) esebinen 12,4 trln teńgeni qurady. Mindetti kásiptik zeınetaqy jarnalary (MKZJ) boıynsha zeınetaqy jınaqtary 374,5 mlrd teńge, erikti zeınetaqy jarnalary (EZJ) aıasynda jınaqtardyń jalpy kólemi shamamen 2,6 mlrd teńge boldy», - dedi qordyń baspasóz qyzmeti.

Atap aıtqanda, bıyl jarnalar kólemi kóbeıgen. 2022 jyldyń bes aıynda salymshylardyń shottaryna shamamen 661,9 mlrd teńge kóleminde zeınetaqy jarnalary tústi. Bul 2021 jyldyń sáıkes kezeńindegi kórsetkishten 29% nemese 147,2 mlrd teńgege kóp.

«Jyl basynan beri BJZQ óz salymshylaryna 947,5 mlrd teńge tóledi. Onyń basym bóligin turǵyn úı jaǵdaıyn jaqsartý jáne emdeý maqsattaryna arnalǵan birjolǵy zeınetaqy tólemderi (BZT) qurady – 840,6 mlrd teńge. Sonymen qatar, jasyna baılanysty tólemder 42,4 mlrd teńge, muragerlik boıynsha tólemder 28,6 mlrd teńge boldy», - delingen habarlamada.

Atap ketý kerek, BJZQ-dan keste boıynsha aı saıynǵy ortasha tólem (zeınet jasyna tolýyna baılanysty) 29 360 teńge, al aı saıynǵy eń joǵary tólem 707 326 teńge boldy.