Elimizdegi zerger dúkenderi reseılik kásipkerlerdiń ákkiliginen zardap shegip otyr

ASTANA. QazAqparat - Baǵaly zergerlik buıymdardy satýmen aınalysatyn astanalyq kásipkerler Eýrazııalyq ekonomıkalyq odaq elderi tarapynan ádiletsiz básekelestik oryn alyp jatqanyna narazy, dep habarlaıdy QazAqparat.

Olar ózderiniń shaǵymdaryn Astana qalasy kásipkerler palatasynda ótken Kásipkerlerdiń quqyǵyn qorǵaý jáne jemqorlyqpen kúres keńesiniń otyrysynda aıtty. 

Elordalyq bıznesmenderdiń aıtýynsha, reseılik zergerlik zaýyttar men saýdagerler Astanada aı saıyn ótetin kórmelerdi saýda ornyna aınaldyryp, Qazaqstan Respýblıkasynyń qazynasyna salynýy tıis salyqtan aınalyp ótip, taýarlaryn birneshe ese tómen baǵamen ótkizedi. Sonyń saldarynan Qazaqstan zańnamasyna saı barlyq salyqtardy tólep otyrǵan jergilikti kásipkerler básekege qabiletti bolmaı otyr. Keıbir zergerlik dúkender tipti jabylýǵa shaq qaldyq dep shaǵymdanýda.

Keńes otyrysynda anyqtalǵanyndaı, 2016 jyly qabyldanǵan «QR Baǵaly metalldar men asyl tastar týraly» zańnyń 12 baby 4 tarmaǵy boıynsha, elde óndirilgen jáne ótkiziletin baǵaly zergerlik buıymdar tańbalaýǵa jáne synamalaýǵa jatqyzylady. Degenmen is júzinde quzyrly organdar ol máseleni qadaǵalaýdyń tetigin qarastyrmaǵan. Osy olqylyqty Eýrazııalyq ekonomıkalyq odaq elderiniń kásipkerleri óz paıdasyna qoldanyp keledi.

Osyǵan baılanysty, Astana qalasy kásipkerleriniń palatasy Qazaqstanda Eýrazııalyq ekonomıkalyq odaq elderi kásipkerleriniń qatysýymen ótetin kórme men jármeńkelerdi uıymdastyrý erejelerin jasaqtaýdy durys dep tapty. Bul ereje baǵaly metalldar men tastardy elge ákelý jáne qaıta shyǵarý protsedýralaryn retteıtin bolady.