Elimizdegi úzdik dombyrashy qyz-kelinshekter anyqtaldy
ORAL. QazAqparat - Atyraýda Dına Nurpeıisova atyndaǵy «Bulbul dombyra» V respýblıkalyq dombyrashy qyz-kelinshekter baıqaýy márege jetti, dep habarlaıdy «QazAqparat» tilshisi.
Barlyǵy 14 úmitker qatysqan dodada atyraýlyq Nuraı Zınor bas júldeni jeńip alsa, almatylyq Áıgerim Netálıeva men astanalyq Toqjan Úmbet - birinshi, qyzylordalyq Farıda Qudaıbergenova - ekinshi, almatylyqtar Symbat Ábdýahap, Tursynzada Álimjanova, Móldir Qoıysova úshinshi orynǵa ıe boldy.
Osy baıqaýǵa Ǵ.Qurmanǵalıev atyndaǵy Batys Qazaqstan oblystyq fılarmonııasy Dáýletkereı atyndaǵy halyq aspaptar orkestriniń múshesi Raýshan Shaqanaeva Jánibek aýdanynyń atynan qatysyp, úshinshi orynǵa ıe boldy. Onyń aıtýynsha, úsh kezeńnen turǵan saıys barysynda qatysýshylar negizinen Dınanyń kúılerin oryndady. Barlyǵy 23 týyndy jattaldy. Osylardyń ishinde keıbireýin mindetti túrde jáne jerebe boıynsha, birqataryn qazylar alqasynyń suraýymen oryndaýǵa tıisti boldy.
Raýshan M.Ótemisov atyndaǵy Batys Qazaqstan memlekettik ýnıversıtetin dástúrli mýzykalyq óner mamandyǵy boıynsha Erkin Nurymbetovtiń klasynda bitirgen. Dáýletkereı atyndaǵy orkestrde 2007 jyldan beri qyzmet etedi.
«Bul - Raýshannyń respýblıkalyq deńgeıdegi úshinshi tabysy. Buǵan deıin Seıtek, Mámen atyndaǵy respýblıkalyq dodalarda úshinshi oryndy ıelengen Raýshan Shaqanaeva - orkestrdiń mýzykanty ári jeke oryndaýshysy. Ol lırıkalyq, sondaı-aq kúshti qajet etetin shyǵarmalardy da sátti oryndaı biledi. Bul rette orkestrdegi tartysy keıbir er adamdardan da artyq shyǵyp otyrady», - dedi «QazAqparat» tilshisine Dáýletkereı atyndaǵy orkestrdiń bas dırıjeri ári kórkemdik jetekshisi, kompozıtor Erkin Nurymbetov.
