Elimizdegi ýnıversıtetterde qyzmet etip júrgen oqytýshylardyń sany belgili boldy
ASTANA. QazAqparat – Qazaqstandaǵy ýnıversıtetterde 36 myńnan astam oqytýshy qyzmet etip júr, dep habarlaıdy QazAqparat tilshisi.
«Qazirgi kezde elimizdegi 120 joǵary oqý ornynda 36 404 oqytýshy eńbek etip júr. Onyń ishinde magıstrler – 10 456 adam, ǵylym kandıdattary – 11 441, PhD doktorlary – 3 732, ǵylym doktorlary – 2 656 adam», - delingen Ǵylym jáne joǵary bilim mınıstrliginiń «QazAqparat» agenttigine bergen jaýabynda.
Vedomstvo málimetine qaraǵanda, Qazaqstan Prezıdentiniń tapsyrmasyn oryndaý maqsatynda oqytýshylardyń jalaqysyn arttyrý máselesin jan-jaqty qaraý úshin arnaıy jumys toby quryldy. Jumys tobynyń usynystary qaralyp, zerttelip, tıisti sheshim qabyldanady.
«Oqytýshylardy yntalandyrý tetikteriniń biri - «Úzdik oqytýshy» konkýrsy. Atalǵan konkýrs 2005 jyldan bastap ótkizilip keledi. Jyl saıyn konkýrstyń jeńimpazdary retinde oqytýshylyq, oqý-ádistemelik jáne ǵylymı-zertteý jumysynda joǵary kórsetkishteri bar oqytýshylar tanylyp keledi. Olarǵa 2000 AEK kóleminde syıaqy beriledi», - dep atalyp ótken mınıstrlik aqparatynda.
Budan buryn habarlanǵandaı, elimizde professorlyq-oqytýshylyq quramǵa jalaqy tóleýdiń jańa júıesi ázirlenedi.
Aıta keteıik, «2022 jylǵy Joǵary oqý ornynyń úzdik oqytýshysy» konkýrsy jeńimpazdarynyń esimderi belgili boldy. Qazaqstandyq 43 JOO-nyń 150 oqytýshysy jeńimpaz atandy.
