Elimizdegi týrızm salasynda qandaı qoldaý is-sharalary qamtylǵan

NUR-SULTAN. QazAqparat – Májilistegi Úkimet saǵatynda QR Mádenıet jáne sport mınıstri Dáýren Abaev týrızm salasyndaǵy qoldaý is-sharalary týraly túsinik berdi, dep habarlaıdy QazAqparat tilshisi.

Ótken jyly 30 sáýirde Týrıstik qyzmet týraly jańa Zań qabyldandy. Onda memlekettik qoldaý boıynsha birqatar jańa yntalandyrý sharalary qarastyrylǵan.

Atap aıtqanda:

- sheteldik týrıst úshin týroperatorlardy sýbsıdııalaý (15 myń teńge);

- taý shańǵysy kýrorttaryna arnalǵan tehnıka men jabdyqtar (aspaly joldar, ratraktar, qar generatorlary) satyp alý shyǵyndaryn óteý (25%);

- týrıstik obektilerdi (10%), jol boıyndaǵy servıs obektilerin salý shyǵyndaryn óteý (10%);

- týravtobýstardy satyp alý shyǵyndaryn óteý (25%);

- sanıtarlyq-gıgıenalyq toraptardy (SGT) kútip-ustaýdy sýbsıdııalaý (83 300 teńge.).

- týrpaket quramyndaǵy balalar avıabıletin sýbsıdııalaý (Kids Go Free).

«Osynyń barlyǵy júzege asyrylyp jatyr. Budan basqa, týrıstik salanyń ınvestıtsııalyq ahýalyn jaqsartý maqsatymen týrızm salasyndaǵy ınvestıtsııalyq jobany basym joba dep taný shegi 2 mln aılyq eseptik kórsetkishten (6,1 mlrd teńge) 200 myń aılyq eseptik kórsetkishke deıin (600 mln teńge) tómendetildi. Bul ınvestıtsııalyq preferentsııalar alýǵa múmkindik beredi», - dedi mınıstr.

Bul qaǵıdalardy oryndaý úshin zańǵa táýeldi qajetti normatıvtik quqyqtyq aktiler qabyldandy. Sonymen qatar, qaǵıdalar tıimdi bolýy úshin olardan shekteý sharalary múmkindiginshe alynyp tastalady.

«Bul jergilikti atqarýshy organdar úshin jobalardy óńirdiń qajettiligine ıkemdele otyryp irikteýge múmkindik beredi. Sol úshin óńirler kórsetilgen memlekettik qoldaý sharalaryn iske asyrý jumystaryn barynsha jandandyrýy qajet. Sonymen qatar, memlekettik organdardyń pozıtsııalaryna sáıkes, bıýdjettik zańnama negizinde, shyǵyndardy óteý tetikteri boıynsha qoldaý sharalaryna qarajat bólý rásimi (týrıstik obektiler, týravtobýstar, jol boıyndaǵy servıs obektileri, taý shańǵysy keshenderi) shamamen jarty jylǵa jetýi múmkin ekenin atap ótemiz. Sýbsıdııalaý sharalary boıynsha (sheteldik týrıstke, balalar avıabıletine, sanıtarlyq-gıgıenalyq toraptardy kútip ustaýǵa) qoldaý sharasynyń qarajaty kásipkerlerdiń ótinimderi negizinde jedel túrde bólinedi», - dedi vedomstvo basshysy.