Elimizdegi týrızm baǵyttary «Máńgilik El» qundylyqtaryn nasıhattaýǵa yqpal etedi
ASTANA. QazAqparat - Qazaqstan týrısterdi tirkeýdiń ádistemesin ózgertedi. Bul týraly búgin Úkimet otyrysynda QR Mádenıet jáne sport mınıstri Arystanbek Muhamedıuly málim etti, dep habarlaıdy QazAqparat.
«2017 jyly Dúnıejúzilik ekonomıkalyq forýmnyń saıahat pen týrızmniń básekege qabilettiligi ındeksine sáıkes, Qazaqstan 136 eldiń arasynda 81 orynda tur. Salystyratyn bolsaq, 2015 jyly elimiz 85 orynda, 2013 jyly - 88, al 2011 jyly 139 memlekettiń ishinde 93 pozıtsııada turǵan edi»,-dep toqtaldy mınıstr 2023 jylǵa deıin Qazaqstannyń týrıstik salasyn damytýdyń tujyrymdamasy boıynsha baıandamasynda.
Elimizdegi týrızm salasynyń kórsetkishterine toqtalatyn bolsaq, 2016 jyly ishki saıahatta bolǵandar 9,6 mln adamdy qurady, sondaı-aq memleketimizge saparlaǵan sheteldikter 6,5 mln adamǵa jetti.
«Statıstıkaǵa súıensek, sheteldikterdiń 90 paıyzy Reseı, Ózbekstan jáne Qyrǵyzstan sekildi TMD elderinen kelgender. Qalǵan 10 paıyzy Qytaı, Túrkııa men Iran jáne ózge memleketterdiń azamattary. Qazirgi kezde QR UEM Statıstıka komıtetimen, «Makkenzı» men «Reformatıks» kompanııalarymen, sonymen qatar ıÝNVTO jáne Dúnıejúzilik bank sarapshylarymen birlese týrısterdi tirkeýdiń ádistemesin ózgertý boıynsha jumystardy júrgizýdemiz»,-dedi A. Muhamedıuly.
«Elimiz baı týrıstik-rekreatsııalyq áleýetke ıe bola tura, týrızmniń basymdyqty túrleri úshin jetkiliksiz damý deńgeıi baıqalýda. Jańadan engiziletin túrleri «Máńgilik El» jalpyulttyq ıdeıasy qundylyqtaryn nasıhattaýǵa yqpal etetin bolady. Bizdiń oıymyzsha, Qazaqstannyń týrıstik qyzmetterin ótkizýdiń áleýetti naryǵyna Reseı, Qytaı, Túrkııa, Iran, Úndistan, Parsy shyǵanaǵy elderi jáne damyǵan elderdiń birshama úlesi qamtylýy múmkin»,-deıdi vedomstvo basshysy.
Aıta keteıik, jańartylǵan tujyrymdama jobasynda mádenı-tanymdyq jáne etnografııalyq týrızm, oqıǵalyq, balalar men jasóspirimder týrızmi, medıtsınalyq, kempıngtik, ańshylyq-trofeılik jáne sporttyq týrızm eskerilip otyr.
