Elimizdegi turaqtylyq úshin daýys berdim – Jarasbaı Súleımenov

PETROPAVL. QazAqparat – Soltústik Qazaqstan oblysynda alǵashqylardyń biri bolyp daýys bergen qoǵam qaıratkeri, Qazaqstannyń Qurmetti jýrnalısi Jarasbaı Súleımenov bul saıası oqıǵanyń mańyzdylyǵy jaıynda aıtty, dep habarlaıdy QazAqparat tilshisi.

Jarasbaı Súleımenov Petropavldaǵy Sábıt Muqanov atyndaǵy qazaq sazdy-drama teatrynda ornalasqan № 627 saılaý ýchaskesinde tańdaýyn jasady. Onyń aıtýynsha, ár adam konstıtýtsııalyq quqyǵyn paıdalanyp, daýys bergeni jón.

«Bul - úlken saıası oqıǵa. Oǵan qatysý kerek, azamattyq quqyqty paıdalaný kerek. Konstıtýtsııalyq Zańǵa sáıkes saılaýǵa aqyl-esi kem, sondaı-aq sot úkimimen bas bostandyǵynan aıyrý oryndarynda otyrǵan azamattar ǵana qatysa almaıdy. Sol sebepti eń basty saıası quqyǵymyzdy paıdalanyp, azamattyq boryshymyzdy óteıik», - deıdi Jarasbaı Súleımenov.

Qoǵam qaıratkeriniń pikirinshe, bıylǵy saılaýdyń ereksheligi – oǵan 5 partııanyń qatysýy. Bul – elimizdegi demokratııanyń kórinisi.

«Men daýysymdy elimizdegi turaqtylyq saqtalýy úshin, Qazaqstandy mekendegen ulttardyń yntymaq-birligi úshin, osy 30 jylda atqarylǵan ulan-ǵaıyr isterdiń ári qaraı jalǵasyn tabýy úshin berdim. Saılaý degende eń aldymen kóz aldyma ata-anam keledi. Olar eńbek adamdary boldy. Sol kúni tańsáriden turyp, bar jaqsy kıimin kıip, saılaý ýchaskesine ketetin. Merekeden kem bolmaıtyn. Mýzyka oınap, arnaıy jármeńke uıymdastyrylatyn. Halyq bir máre-sáre bolyp qalatyn. Áke-sheshemniń tárbıesin kórgen men bir ret te saılaýdan qalǵan emespin. Bul joly da zaıybym ekeýimiz birge baryp óz tańdaýymyzdy jasadyq», - deıdi «Qyzyljar-Aqparat» JShS dırektory, belgili jýrnalıst Jarasbaı Súleımenov.