Elimizdegi tórt balaly otbasylar sany 18,7 paıyzǵa jetip otyr - T. Dúısenova
ASTANA. 12 jeltoqsan. QazAqparat - Elimizdegi tórt balaly otbasylar sany 18,7 paıyzǵa jetip otyr. Bul týraly búgin Parlament Senatynyń jalpy otyrysynda «Qazaqstan Respýblıkasynyń keıbir zańnamalyq aktilerine áleýmettik qamsyzdandyrý máseleleri boıynsha ózgerister men tolyqtyrýlar engizý týraly» zań jobasyn talqylaý barysynda Eńbek jáne halyqty áleýmettik qorǵaý mınıstri Tamara Dúısenova málim etti.
Sóz arasynda mınıstr statıstıkaǵa súıene otyryp, qaladaǵy otbasylarda bala týý jaǵynan aýyldaǵylarmen teńesip kele jatqanyn alǵa tartty. «Osydan 10 jyl buryn, ıaǵnı 2003 jyly biz balalar járdemaqysyn tóleı bastaǵan kezde tórt balaly ata-analar sany jalpy otbasylardyń 7 paıyzyn quraıtyn edi. Búgingi tańda 1 jeltoqsandaǵy jaǵdaı boıynsha olardyń sany 18,7 paıyzdy qurap otyr. Sonyń 45 paıyzy - qalada turatyn jas otbasylar», - dedi mınıstr.
