Elimizdegi telearnalar maǵynasyz shoýǵa tolyp ketti - R. Halmuradov
ASTANA. Qyrkúıektiń 8-i. QazAqparat /Qanat Mámetqazyuly/ - Búgin QR Parlamenti Májilisiniń jalpy otyrysynda Baılanys jáne aqparat mınıstiriniń atyna saýal joldaǵan depýtat Rozaqul Halmuradov el telearnalaryndaǵy maǵynasyz shoýlardyń taralýyna alańdaýshylyq bildirdi.
«Elimizdegi telearnalardaǵy qazaq tilindegi baǵdarlamalar salmaǵy kemidi. Esesine, qostildi baǵdarlamalar men sýbtıtrli aýdarmalar qaptap ketti. Jasóspirimderge arnalǵan argentınalyq telehıkaıalar kórermenderdi ádepsiz áreketterge «tárbıeleýde». Jetkinshekterdiń sana-sezimin ýlap, keri áserin tıgizetin atalmysh kórinister halyqtyq psıhologııa men ulttyq mentalıtetimizge múldem kereǵar», - dedi R. Halmuradov. Sonymen birge, depýtat qazaqstandyq telearnalardy jaýlap alǵan sheteldik serıaldarǵa, reseılik shoýlarǵa qatysty pikirin aıta kele, búgingi býynnyń klassıkalyq týyndylardan alshaqtaǵanyna qynjylys bildirdi.
«Jabaıy jahandanýdyń ýly tamyry - batystyń sapasyz dańǵyrlaq áýeni men kınosynan arylyp, ultymyzdyń dástúrli mádenıetin keıingi urpaqqa qaımaǵyn buzbaı jetkizý úshin telearnalardan ulttyq qazynany kórermenge usynýǵa qashan qol jetkizemiz? 24 saǵat qazaq tilinde sóıleıtin, jastardy rýhanı adamgershilikke tárbıeleıtin, mektep oqýshylarynyń boıynan otanǵa súıispenshilikti oıatatyn telearnalar týra qaı jyly, qaı aıda ashylady? Maǵynasyz shoýlardy sypyryp tastap, qazaqı rýhtaǵy týyndylar qashan telearnadan oryn alady?», -dedi R. Halmuradov.
