Elimizdegi sottalǵan azamattardy aqyly eńbekke tartýdyń arnaıy baǵdarlamasyn daıyndaý qajet - Bas prokýrordyń orynbasary
ASTANA. 10 jeltoqsan. QazAqparat /Aıdar Ospanalıev/ - Elimizdegi sottalǵan azamattardy aqyly jumysqa tartýdyń arnaıy baǵdarlamasyn daıyndaý qajet. Bul týraly búgin Astanada ótip jatqan «Quqyq qorǵaý organdaryn reformalaý kezinde qylmystyq - atqarý júıesiniń qyzmetin jetildirý» atty dóńgelek ústel otyrysynda Bas prokýrordyń orynbasary Asqar Sekishov málim etti.
Onyń sózine qaraǵanda, búgingi tańda elimizdiń qylmystyq-atqarý júıesine qatysty mańyzdy máselelerdiń biri - sottalǵandardy jumyspen qamtý máselesi bolyp otyr. Sondyqtan da aldaǵy ýaqytta sottalǵan azamattardy aqyly eńbekke tartýdyń arnaıy baǵdarlamasyn jasaǵan jón.
«Atalmysh shara bas bostandyǵynan aıyrý oryndarynan bosap shyǵatyn azamattardyń qoǵam arasyndaǵy ómirge beıimdeýge múmkindik beredi. Qazirgi tańda bul máselemen aınalysý «Eńbek» memlekettik kásipornyna júktelgen. Al bul mekeme óziniń mindetin talapqa saı atqara almaı otyr. Onyń basty sebebi, atalmysh kásiporyn kommertsııalyq baǵyttaǵy ujym. Sondyqtan ol kez-kelgen máseleni óziniń múddesine qaraı burady», - dedi Bas prokýrordyń orynbasary.
Onyń paıymdaýynsha, elimizde bas bostandyǵynan aıyrý oryndaryn salý nemese olardyń qolda baryn qaıta jóndeýden ótkizýge qajetti qarjy kólemin arttyrý jaǵyn qarastyrǵan jón. «Sondaı-aq sottalǵandarǵa kórsetiletin kommýnaldyq, turmystyq, sondaı-aq medıtsınalyq qyzmetterdiń talapqa saı bolýyn qadaǵalaǵan abzal», - dedi A.Sekishov.
