Elimizdegi sot qyzmeti reformaǵa saı damyp keledi - baspasózge sholý
***
Keshe Joǵarǵy Sotta joǵary sot organy sýdıalarynyń ótken jyly sot tóreligin atqarýdyń qorytyndysy boıynsha «Zań ústemdigin qamtamasyz etý sottardyń basty mindeti» taqyryby aıasynda alqa májilisi ótti. Osy alqaly jıyn arqaý bolǵan maqala «Egemen Qazaqstan» gazetiniń senbilik sanynda «Joǵarǵy Sot Tóraǵasy Qaırat Mámı: Elimizdegi sot qyzmeti reformaǵa saı damyp keledi» degen taqyryppen berildi. Basylymnyń jazýynsha, alqaly jıyndy ashqan Joǵarǵy Sot Tóraǵasy Qaırat Mámı bıylǵy jyldyń 1 qańtarynan bastap «100 naqty qadam» Ult Josparyn oryndaýdyń praktıkalyq kezeńin iske asyrý bastalǵanyn atap ótti. «Osy kezge deıin 59 zań kúshine endi, olar memleketti, ekonomıka men qoǵamdy damytý úshin qaǵıdatty jańa quqyqtyq ortany quraıdy. Memlekettik qurylystyń osy kezeńine kóshý bes ınstıtýttyq reformamen aıqyndalady. Barlyq bes ınstıtýttyq reformanyń tabysty oryndalýy zań ústemdigin qamtamasyz etýge tikeleı táýeldi», degen Qaırat Ábdirazaquly bul mindet keńeıtilgen qorytyndy májilistiń basty taqyrybyna aınalyp otyrǵandyǵyn atap ótti. Onyń aıtýynsha, kórsetkishter sottardyń ótken jylǵy sot tóreligin iske asyrý boıynsha sapaly jumysyn kýálandyrǵan: 2015 jyly sottar isterdi 2,5 paıyzǵa artyq aıaqtaǵan, sot aktileriniń absolıýttik kópshiligi zańdy ári negizdi dep tanylǵan. Al jańa qylmystyq jáne qylmystyq-protsestik zańnamanyń jaǵdaılarynda sottarǵa túsken barlyq qylmystyq isterdiń úsh bóliginen astamy qylmystyq teris qylyqtardy quraǵan. Árbir onynshy is boıynsha sotqa deıingi tergeý jedeldetilgen tártipte aıaqtalyp, 1 423 is boıynsha jeńildetilgen sotqa deıingi tergeý júrgizilgen. Kináni moıyndaý týraly mámileler boıynsha da belgili praktıka qalyptasa bastaǵan. Muny kelisimdik is júrgizýde qaraý úshin 2,5 myńnan astam qylmystyq is túsýinen de ańǵarýǵa bolady eken.
Merziminen buryn ótetin Májilis saılaýyna qoǵam tarabynan qoldaý qýatty. Kún saıyn buqaralyq aqparat quraldary betinde esimderi elimizge tanymal azamattardyń pikirleriniń dúrkin-dúrkin jarııalanyp jatýy da sonyń aıǵaǵy bolsa kerek. Máselen, búgin «Egemen Qazaqstan» gazetinde Qazaqstan Respýblıkasy Ulttyq ǵylym akademııasynyń prezıdenti Murat Jurynovtyń pikiri jarııalandy. Ol Májilis pen jergilikti máslıhattardy qaıta saılaý der kezindegi qolǵa alynǵan is shara ekendigin basa aıtqan. «Qazaqstannyń ekonomıkasyn damytýda, Qazaqstan halqyn ári qaraı órkendetýde munyń róli zor. Qazirgi dúnıejúzilik daǵdarys oryn alǵan kezeńde ár memleket tez arada ári der kezinde óziniń etek-jeńin jıyp alyp jatyr. Qazaqstan halqynyń Elbasynyń aınalasyna judyryqtaı jumylýyn men solaı túsinemin. Qazaq aıtqandaı, «Bir jaǵadan bas shyǵaryp, bir jeńnen qol shyǵaratyn» kez týdy», - deıdi ol. Al «Turan» ýnıversıtetiniń rektory, Qazaqstan Respýblıkasy Joǵary oqý oryndary qaýymdastyǵynyń tóraǵasy Rahman Alshanov bul saılaý táýelsiz eldiń bolashaǵy úshin jasalatyn mańyzdy qadam degen pikirin bildirdi. «Bul bastama endigi sheshýshi kezeńde bizdiń qoǵamnyń áleýmettik-ekonomıkalyq máselelerge basa nazar aýdaryp, memlekettik strategııalyq baǵdarlamalardy tıimdi júzege asyrýǵa, jańa múmkindikterge jol ashady dep senemin», - deıdi R.Alshanov.
***
«Fýtboldan Qazaqstan quramasynyń jańa jattyqtyrýshysy frantsýzdyq Erve Renar bolady», - dep jazady «Kazahstanskaıa pravda» gazeti. Basylymnyń atap ótýinshe, frantsýzdyq maman elordaǵa ushyp kelip, Qazaqstan Fýtbol federatsııasynyń basshylyǵymen kelissózder júrgizgen. Taıaý kúnderi ony buǵan deıin qyzmetinen ketken reseılik bapker ıÝrıı Krasnojannyń ornyna Qazaqstan quramasynyń bas jattyqtyrýshy retinde tanystyrady dep kútilýde.
***
«A denjkı-to babaı ýnes». Dál osy taqyryppen «Ekspress-K» gazetinde jarııalanǵan maqalada almatylyqtardyń «Ońaı» jolaqy tóleý elektrondy bıletterinen aqshalarynyń joǵalýyna oraı shaǵymdana bastaǵany baıandalǵan. Qalalyqtardyń sózine qaraǵanda, murty buzylmaǵan elektrondy kartadan tosynnan aqshanyń joq bolý derekteri kezdese bastaǵan. Mundaı jaǵdaıda jolaýshylar qalalyq jolaýshylar kóligin túsip barar jerine jaıaý jetýge, ne bolmasa bılet júrýge, tipti bolmaǵanda zańsyz bolsa da júrgizýshige aqsha berýge májbúr.
***
Tanymal saıasattanýshy Dosym Sátbaev Almatydaǵy Abaı atyndaǵy Opera teatrdyń mýzeıin qurmaq. Bul jaıynda «Vremıa» gazetindegi «Vsegda GATOB» degen taqyryptaǵy maqalada aıtylǵan. Basylymnyń jazýynsha, opera ǵımaratynda onyń tarıhynan syr shertetin jádigerler az emes. Degenmen, osy ýaqytqa deıin teatr mýzeıi shaǵyn ǵana bólme bolatyn. Endigi ýaqytta D.Sátbaev teatrǵa keletin kez kelgen azamat bul jádigerlerdi erkin tamashalaýǵa múmkindik alatyndaı jaǵdaı jasamaq. Qazirgi ýaqytta jádigerler teatrdyń úshinshi qabatyna ornalastyrylýda.
