Elimizdegi saılaýdy baqylaý úshin 20 myńǵa jýyq baıqaýshy daıarlanady

NUR-SULTAN. QazAqparat - Qazaqstanda prezıdent saılaýyna baqylaý jasaıtyn baıqaýshylardy oqytatyn trenıng bastaldy. Trenıng barysynda shamamen 20 myń táýelsiz baıqaýshyny daıyndaý kózdelgen, dep habarlaıdy QazAqparat tilshisi.

«Amanat» azamattyq tuǵyrnamasy búgin baıqaýshylardy daıyndaıtyn kapıtandardy daıarlyqtan ótkizýge arnalǵan birinshi semınardy bastaıdy. Búgin biz nıet tanytqan shamamen 30 baıqaýshyny oqytamyz. Saılaý kúni el aýmaǵynda 10 myń ýchaske jumys isteıtin bolady. Ár ýchaskeni bir-birin almastyryp otyratyn 2 baıqaýshymen qamtamasyz etýdi kózdeımiz. Osylaısha, shamamen 20 myń baıqaýshyny daıyndaýdy josparlap otyrmyz», - dedi «Amanat» azamattyq tuǵyrnamasy shtabynyń múshesi Musaǵalı Dýambekov.

Onyń aıtýynsha, «Amanat» azamattyq tuǵyrnamasynyń músheleri erteńnen bastap Qazaqstannyń barlyq óńirlerindegi baıqaýshylarǵa oqytý semınarlaryn ótkize bastaıdy. Buǵan qosa, baıqaýshylarǵa arnaıy «Baıqaýshynyń qoıyn dápterin» ázirlep qoıǵan. Onda saılaý kezindegi is-áreketter túsinikti túrde jazylǵan.

«Máselen, biz baıqaýshylarǵa qandaı aýmaqta bolatynyn, eger kabınaǵa 2 adam kirip ketse ne talap etý kerek, qandaı áreket jasaý qajettigin aıtamyz. Saılaý baıqaýshylaryna búkil protsesti bastan-aıaq jazyp alý úshin ózderimen birge fotoapparat, kamera, batareıka, qýattandyrǵysh qurylǵy alyp júrýge keńes beremiz. Nátıjesinde 10 maýsym kúni bizde barlyq ýchaskeden óte mol vıdeomaterıal bolady», - dedi ol.

Shtab múshesiniń aıtýynsha, saılaý protsesin jasy 18-ge tolǵan kez kelgen azamat baqylaı alady.

«Ol úshin shtabqa habarlasyp, ótinim berý qajet. Áleýetti baıqaýshylarǵa ózderi daýys beretin ýchaskeni tańdaýǵa keńes beremiz», - dedi M.Dýambekov.