Elimizdegi sapasyz maı ónimderiniń basym bóligi reseılik taýarlar - Nurqan Sádýaqasov

ASTANA. QazAqparat - Ótken jyly Qazaqstanda satylatyn 100-den astam maı ónimderiniń quramy talapqa saı emes dep tanyldy. Sonyń basym bóligi - reseılik taýarlar. Bul týraly QR Ulttyq ekonomıka mınıstrligi Tutynýshylar quqyqtaryn qorǵaý komıteti tóraǵasynyń orynbasary Nurqan Sádýaqasov málim etti, dep xabarlaıdy QazAqparat tilshisi.

«Iá, ótken jyly biz maı ónimderiniń (ósimdik maıy, sary maı, margarın, maıonez jáne taǵy basqa - avt.) quramyn tekserip shyqtyq. Sonyń qorytyndysy boıynsha 117 synamanyń nátıjesi talapqa saı bolmaı shyqty. Іshinde qazaqstandyq ónimder de bar. Degenmen, basym bóligi, ıaǵnı 64 paıyzy Reseı Federatsııasyna tıesili. 24 paıyzy bizdiki jáne 15 paıyzy Qyrǵyzstan, Belarýs, Ýkraına men Frantsııanyń úlesinde», - dedi Sádýaqasov búgin Astanada ótken baspasóz máslıxatynda.

Jalpy, ótken jyldyń qorytyndysy boıynsha azyq-túlik ónimderi boıynsha 40 myńnan astam synama alyndy. Sonyń 14,4 paıyzy texnıkalyq talaptarǵa saı emes dep tanyldy. Ondaı taýardy shyǵaratyndar kóp jaǵdaıda ónim qaptamasyndaǵy aqparatty durys kórsetpeıdi. Sondaı-aq tekserilgen taýarlarda ishek taıaqshasy sııaqty bakterııalar tabylǵan.

«Byltyr osy ispetti taýardyń 25,5 tonnasy tárkilendi. Jaýapty azamattar ákimshilik jazaǵa tartyldy. Ondaı kásipkerlerge barlyǵy 87,9 mıllıon teńge kóleminde aıyppuldar salynyp, 35 nysannyń jumysy toqtatyldy», - dep atap kórsetti komıtet basshysynyń orynbasary.

Aıta keteıik, búgingi baspasóz máslıxatynda Qaraǵandy qalasynyń azamattyq keńes tóraǵasy Ermek Ábildın elimizde saýdalanyp kelgen birqatar sapasyz maı ónimderin jarııa etti.