Elimizdegi ruqsat berý qujattarynyń 35 paıyzyn joıý qajet - S. Ahmetov
ASTANA. Qazannyń 27-si. QazAqparat /Arman Asqarov/ - Ruqsatnama júıesin jetildirý boıynsha qurylǵan jumys toby elimizdegi ruqsat berý qujattarynyń 35 paıyzyn joıýdy usynyp otyr.
Bul týraly búgin Úkimet otyrysynda QR Premer-Mınıstriniń orynbasary Serik Ahmetov málim etti, dep habarlaıdy QazAqparat.
Onyń aıtýynsha, búgingi tańda respýblıkda 1 myńnan astam ruqsat berý qujattary tirkelgen. «Jumys toby osy qujattardyń 35 paıyzyn joıýdy usynyp otyr. 348 ruqsatnamanyń ishinde 113 lıtsenzııa berý qyzmeti bar. Advokattyq, notarıaldyq, baǵa berý, aýdıtorlyq jáne taǵy basqa qyzmet túrleri boıynsha memlekettik organdar men qoǵamdyq uıymdardyń birlesken is-qımylyn qamtamasyz etip, lıtsenzııa berýden ózin-ózi retteý jumysyna kóshý qajet», dedi S. Ahmetov.
QR Premer-Mınıstriniń orynbasary atap kórsetkendeı, qazirgi kezde elimizde ruqsatnama júıesin jetildirý boıynsha arnaıy Úkimet qaýlylary men zań jobalary ázirlenýde. Olarǵa sáıkes 5 kodekske, 1 konstıtýtsııalyq jáne 41 zańǵa, 77 Úkimet qaýlysyna, 55 mekeme buıryqtaryna ózgerister men tolyqtyrýlar engizý qarastyrylǵan.
