Elimizdegi pedagogıkalyq ınstıtýttarǵa ýnıversıtet dárejesin berý kerek - senator Ǵ. Esim
ASTANA. Qazannyń 22-ci. QazAqparat /Qanat Mámetqazyuly/ - Elimizdegi memlekettik pedagogıkalyq ınstıtýttarǵa ýnıversıtet dárejesin berý kerek.
Búgin QR Parlamenti Senatynyń jalpy otyrysynda Úkimet basshysynyń atyna saýal joldaǵan senator Ǵarıfolla Esim osylaı málim etti, dep habarlaıdy QazAqparat.
«Kezinde qysqaryp nemese ózge joǵary oqý oryndarynyń quramyna engen Aqtóbe, Semeı, Taraz, Qostanaı, Pavlodar, Arqalyq qalalaryndaǵy pedagogıkalyq ınstıtýttar 2004 jyly Prezıdenttiń bastamasymen qaıtadan qalpyna keltirilip, olarǵa memlekettik mártebe berildi. Atalǵan joǵary oqý oryndarynda 20-dan asa mamandyq boıynsha 24 myń 101 stýdent bilim alýda, 1 myń 116 oqytýshy, 49 ǵylym doktory, 440 ǵylym kandıdaty men 221 magıstr dáris beredi. Sonymen birge, Qazaqstan boıynsha joǵary oqý oryndarynyń ishinde áskerı, birdi-ekili jekemenshik joǵary oqý oryndaryn qospaǵanda ınstıtýt dárejesinde qalyp otyrǵan osy alty oqý orny ǵana. Bul oqý oryndaryn «ınstıtýt» dep ataý olardyń mártebesin kishireıtip, talapkerlerdiń, ata-analardyń qyzyǵýshylyǵyn tómendetip qana qoımaı, pedagog mamandyqty ıgergisi keletin úmitkerlerdiń talabyna keri áserin tıgizýde», dedi senator.
Sonymen birge, depýtat joǵaryda atalǵan alty ınstıtýttyń arnaıy pedagogtar daıyndaıtyn joǵary oqý orny ekendigin aıta kele, bulardyń qoǵamdaǵy orny erekshe bolý kerektigin alǵa tartady. Jaqynda stýdentter aldynda Elbasynyń oqyǵan dárisinde kóterilgen máseleni de alǵa tartqan Ǵ. Esim, pedagogtar tárbıeleıtin joǵary oqý oryndaryna jańa kózqaras kerektigin aıtty.
«Atalǵan joǵary oqý oryndaryn ınstıtýt dárejesinen ýnıversıtet dárejesine kóterýdiń ýaqyty keldi. 2008 jyly Qyzdar pedagogıkalyq ınstıtýty Úkimet qaýlysymen ýnıversıtetke aınalǵan edi. Demek, joǵaryda atalǵan pedagogıkalyq ınstıtýttarǵa da ýnıversıtet mártebesin berý zaman talaby. Men kóptegen jyldar boıy joǵary oqý oryndarynda qyzmet atqarǵan adammyn. Sondyqtan, ınstıtýttar men ýnıversıtetterge degen qoǵamnyń, ustazdar qaýymynyń pikirin jaqsy bilemin. Sol sebepti joǵaryda atalǵan alty pedagogıkalyq ınstıtýttardy ýnıversıtet dárejesine kóterý qajet. Muny bilim salasynda sapalyq júıelikti jetildiretin jáne pedagog mamandar daıyndaý isinde erekshe mańyzdy memlekettik deńgeıdegi shara dep bilemin», dedi senator Ǵ. Esim.
