Elimizdegi ózen sýyn tıimdi paıdalanbaı otyrmyz - depýtat

ASTANA. QazAqparat - Qazaqstannyń jerústi sý resýrstarynyń qysqarýy úrdisi baıqalýda. Bul týraly Májiliste transshekaralyq ózenderdiń sý resýrstaryn paıdalaný taqyrybyna arnalǵan dóńgelek ústel otyrysynda Parlament Májilisiniń depýtaty Qudaıbergen Erjan aıtty, dep habarlaıdy QazAqparat.

«Sarapshylardyń baǵalaýy boıynsha, Qazaqstan Eýrazııa kontınentindegi sý resýrstarynan aıtarlyqtaı tapshylyq kórip otyrǵan memleketterdiń biri. Respýblıkanyń jerústi sýlarynyń jartysy shekaralas elderdiń aýmaǵynan keledi. Sońǵy 20 jyldyń ishinde Qazaqstannyń jerústi sý resýrstarynyń qysqarýy úrdisi baıqalýda. Qazaqstan men Qytaıdyń aýmaǵynan 24 transshekaralyq ózender aǵyp ótedi. Qytaı jaǵy óziniń aýmaǵynda jańa sý qoımalaryn salyp, sýdy óz jerinde paıdalaný joldaryn bizdiń elmen eseptespeı paıdalanýdyń saldarynan, biz sý tapshylyǵyn kórip jatyrmyz. Degenmen de biz elimizge kelip jatqan sýdyń ózin de durys paıdalanbaı otyrǵanymyzdy atap ótken jón», - dep toqtaldy depýtat.

Onyń sózine qaraǵanda, sýmen qamtamasyz etýdiń qalyptasqan tártibi saqtalynbaǵan jaǵdaıda soltústik, shyǵys, ortalyq oblystarynyń ónerkásipterine, aýyl sharýashylyǵyna úlken soqqy bolady. Eń mańyzdysy, Balqash jáne Zaısan kólderiniń ekologııalyq jaǵdaıy nasharlaýy múmkin.

«Bizdiń elimizde Ertis ózeniniń ekonomıkalyq mańyzy aıtarlyqtaı úlken. Onymen sanaspaýǵa bolmaıdy. Respýblıka aýmaǵyndaǵy ózen basseınderinde 2,5 mıllıonǵa jýyq halyq ómir súredi», - dedi Qudaıbergen Erjan.