Elimizdegi munaı óńdeý zaýyttary jańartylýda
ASTANA. 7 tamyz. QazAqparat - Qazaqstanda úsh munaı óńdeý zaýytyn qaıta qurylymdaý jáne jańartý jumystary júrgizilýde.
Bul týraly Munaı jáne gaz mınıstrliginiń baspasóz qyzmetine silteme jasap Pm.kz. saıty habarlaıdy.
«Qazaqstan Respýblıkasynyń Údemeli ındýstrııalyq-ınnovatsııalyq damý memlekettik baǵdarlamasynyń aıasynda iske asyrylyp otyrǵan bul jobalar basymdyqqa ıe. Zaýyttardy jańartý jumystary kezeń-kezeńmen 2015 jyldyń aıaǵyna deıin júrgiziledi», - delingen vedomstvo habarlamasynda. Aıta ketý kerek, munaı óńdeý zaýyttarynda óndirilip jatqan ónimder EÝRO-2 standarttaryna saı keledi. Mınıstrliktiń aqparaty boıynsha, zaýyttardy qaıta qurylymdaý jáne jańartý jumystary olardaǵy ábden tozyǵy jetken jabdyqtardy aýystyrýǵa, ashyq tústi munaı ónimderiniń óndirisin arttyrýǵa múmkindik beredi.
Al bul óz kezeginde, ishki naryqtyń suranysyn tolyq qamtamasyz etýge, sondaı-aq joǵary oktandy benzın ónimderiniń ımportyna degen táýeldilikten qutylýǵa jaǵdaı jasaıdy. Jańartý jumystary oǵan qosa, ónimdi tereńirek óńdeýge jáne benzın men dızeldik otynnyń sapasyn jaqsartýǵa, qorshaǵan ortaǵa keletin zııandy áserlerdi azaıtýǵa, sondaı-aq munaı ónimderiniń sapasyn Eýro-5 standarttaryna jetkizýge múmkindik beredi.
