Elimizdegi múmkindigi shekteýli jandardyń jartysynan astamy eńbekke qabiletti jasta

NUR-SULTAN. QazAqparat – Elimizde múmkindigi shekteýli jandardyń 100 myńy jumys isteıdi. Bul týraly QR Eńbek jáne halyqty áleýmettik qorǵaý mınıstrliginen málim boldy, dep habarlaıdy QazAqparat.

«Múgedektigi bar azamattar, basqa da osal áleýmettik toptardyń ókilderi sııaqty, memlekettik baǵdarlamaǵa qatysýda basymdyqqa ıe. Bizdiń elimizde 700 myńnan astam múgedektigi bar adam turady, olardyń jartysynan kóbi eńbekke qabiletti jasta. Alaıda, olardyń ishinde resmı málimetter boıynsha, shamamen 100 myń adam jumys isteıdi. Sondyqtan múgedekterdi eńbek naryǵyna beıimdeý mańyzdy ári ózekti másele bolyp tabylady», – dep atap ótti QR Eńbek mınıstrligi Halyqty jumyspen qamtý departamenti Eńbek naryǵyn damytý basqarmasynyń basshysy Baqyt Qashyrbekov.

Budan buryn habarlanǵandaı, bıyl Qazaqstan boıynsha «Eńbek» baǵdarlamasyna 526 myńnan astam adam qatysyp, túrli qoldaý túrlerin aldy. 338,2 myń adam jumysqa ornalastyryldy, onyń ishinde 189,4 myńy turaqty jumysqa, memleket sýbsıdııalaıtyn jumys oryndaryna 187,3 myń adam jumysqa ornalastyryldy, 9,6 myń jeńildikti kredıt jáne 38 myń qaıtarymsyz grant berildi, «Bastaý Bıznes» jobasy boıynsha kásipkerlik negizderine qysqa merzimdi oqytýdan 33,2 myń adam ótti.

Óz kezeginde, osy memlekettik baǵdarlama aıasynda qoldaý alǵan múgedektigi bar adamdardyń jalpy úlesi nebári 2,1 paıyzdy – 11,4 myń azamatty quraıdy. Onyń ishinde 4 myńy turaqty jumys oryndaryna, 6 myńnan astamy ýaqytsha jumysqa ornalastyryldy, 448 azamat qysqa merzimdi kásiptik oqytýmen qamtyldy, 284 adam mıkrokredıt aldy jáne 700 adam memlekettik grant aldy. Al 504 adam «Bastaý Bıznes» jobasy boıynsha kásipkerlik qyzmet negizderine oqytýǵa jiberildi.