Elimizdegi mıneraldy shıkizat bazasyn damytý baǵdarlamasyna ózgerister engizý kerek - Á.Isekeshov
TANA. 5 qazan. QazAqparat /Aıdar Ospanalıev/ - Indýstrııa jáne jańa tehnologııalar mınıstri Áset Isekeshovtyń aıtýynsha, búgingi Qazaqstannyń geologııa júıesinde sheshimin kútken máseleler jeterlik. Bul týraly mınıstr búgin geologııa salasyn damytýǵa qatysty ótken dóńgelek ústel otyrysynda málim etti.
Onyń sózine qaraǵanda, bul máselede barlyq baǵyttar boıynsha tıisti sheshim qabyldaý qajet jáne bul sheshimder geologııa salasyn búgingi daǵdarystan shyǵaratyndaı bolǵany jón. «Búginde bul problemalar negizinen mıneraldy shıkizat bazasynyń jaǵdaıymen, geologııa salasynyń ınfraqurylymymen, geologııa salasyn retteıtin zańnamalarmen baılanysty. Sondaı-aq kadr máselesi de osy salada birshama qıyndyqtar týdyryp otyrǵan jaıy bar»,-dedi mınıstr.
Onyń aıtýynsha, elimizdegi qatty, paıdaly qazbalardyń 80 paıyzy jer qoınaýyn paıdalanýshylarǵa berildi. Sonymen qatar gelologııa salasy boıynsha osy ýaqytqa deıin saqtalyp kelgen qordyń basym bóligi naryq jaǵdaıynda básekege qabiletsiz bolyp shyqty. Nátıjesinde qordyń ósý qarqyny báseńsidi. «Ókinishke oraı, qazir Geologııa komıtetinde osy málimetterdi tekserýdiń normatıvti-ádistemelik jáne uıymdastyrýshylyq protsedýralary jasalmaǵan. Biz jer qoınaýyn paıdalanýshylardan tıisti málimetterdi alǵanymyzben olardyń anyq-qanyǵyna tekserý júrgize almaı otyrmyz. Osy úrdis jalǵasa beretin bolsa Qazaqstannyń shıkizat bazasy boıynsha, aldaǵy 15-20 jylda kúrdeli máseleler týyndaýy múmkin»,-dedi Á.Isekeshov.
Sondaı-aq onyń sózinshe, elimizde mıneraldy-shıkizat bazasyn damytý baǵdarlamasy 2003 jyldan beri júzege asyrylyp keledi jáne osy qujat aıasynda geologııa salasyna ondaǵan mıllıard teńge bólindi. «Soǵan qaramastan biz josparlaǵan nátıjege jete almaı otyrmyz. Sondyqtan bizge qazir geologııa salasy boıynsha elde bar qorlarǵa revızııa júrgizý kerek. Sondaı-aq túrli-tústi metalldar boıynsha málimetterge ekpin sala otyryp, resýrstyq bazanyń basym baǵyttaryn qaıta qaraý kerek. Budan soń osy salanyń ǵalymdarymen, qoǵam ókilderimen kelise otyryp, mıneraldy shıkizat bazasyn damytý baǵdarlamasyna ózgerister engizsek degen oıdamyz»,-deıdi mınıstr.
