Elimizdegi metall óńdeý kásiporyndary qashan tolyq shıkizatpen qamtylady

Búgingi tańda tústi metaldardy óńdeý kórsetkishi tómen. Basymdyq eksportqa beriledi. Bul másele «Jer qoınaýyn paıdalaný jáne ınvestıtsııalyq ahýaldy jaqsartý máseleleri týraly» QR zańynyń konsýltatıvtik qujatynda kóterilgen, dep habarlaıdy QazAqparat tilshisi.

«Tústi metall óndirýshiler otandyq óńdeý kásiporyndarynyń qajettiligin tolyq qamtamasyz ete almaıdy. Sondaı-aq, bastapqy metall eksportynyń úlesi basym. Atap aıtqanda, alıýmınııdiń - 93,6%, mystyń - 96,6%, qorǵasynnyń - 82,9%, myryshtyń - 88,7% jáne bolattyń 11,2%-y shet memleketterge jóneltiledi. Bul kólemdegi metaldar daıyn ónim kúıine deıin óńdelýi tıis. Sáıkesinshe onyń quny joǵary bolady, ulttyq ónimniń básekege qabilettiligi artady», - delingen qujatta.

Ónerkásip jáne qurylys mınıstrligi otandyq kásiporyndardy shıkizatpen qamtamasyz etý úshin óndirýshi jáne óńdeýshi kompanııalar arasynda mámile jasaýǵa mindetteıtin zańdy qaıta qaraýdy usynyp otyr.

«Óńdeý kásiporyndaryn bastapqy metalmen qamtamasyz etýdi birneshe jylda 50%, keıin 80%-ǵa deıin ulǵaıtý josparlanǵan», - dep mınıstrlik josparlaryn baıandaǵan.

Vedomstvo aldaǵy 13 jylda óńdeýshi kásiporyndardyń tústi metal shıkizatyna degen qajettiligin myna mólsherde qamtamasyz etpek:

- 2025 jyl - 20%;

- 2030 jyl - 50%;

- 2033 jyl - 80%;

- 2036 jyl - 100%.

Sonymen qosa qujatta elimizdegi óńdeý ónerkásipteriniń jaı-kúıi de jazylǵan. Máselen, Qazaqstanda alıýmınııdiń tek 17% óńdelip, qalǵany eksportqa jiberiledi.