Elimizdegi mektepterdiń kópshiliginde órt qaýipsizdigi normalary óreskel buzylýda - TJM
TANA. 16 tamyz. QazAqparat /Marlan Jıembaı/- Elimizdegi mektepterdiń kópshiliginde órt qaýipsizdigi normalary óreskel buzylyp, paıdalanylýda.
Bul týraly búgin Úkimettiń selektorlyq formattaǵy otyrysynda QR Tótenshe jaǵdaılar mınıstri Vladımır Bojko málim etti.
Tamyz aıynda elimizdiń Tótenshe jaǵdaılar mınıstrligi bilim berý nysandarynyń órtke qarsy jaǵdaıyna negizgi tekserý jumystaryn júrgizgendigin atap ótken mınıstr: «Tekserý nátıjesi mektepterde órt qaýipsizdigin arttyrý boıynsha oń dınamıka qalyptasyp otyrǵandyǵyn kórsetedi. Degenmen, tekserý nátıjesi olardyń kópshiliginiń órtke qarsy kúres jaǵdaıynyń qanaǵattanbaıtyn kúıde paıdalanyp otyrǵandyǵyn dáleldeıdi»,- dedi ol.
V.Bojkonyń alǵa tartqan derekterine qaraǵanda, respýblıka boıynsha 5178 bilim nysany órt-tehnıkalyq zertteýden ótken. Sonyń nátıjesinde órtke qarsy qaýipsizdik normalary talaptarynyń 17 myńnan astam zań buzýshylyqtary aıqyndalǵan. Atalǵan nysandardaǵy negizgi buzýshylyqtar alǵashqy órt sóndirý quraldary sanynyń jetkiliksizdigi, ishki jáne syrtqy órtke qarsy sýmen jabdyqtaý júıeleriniń aqaýlyǵy, órtti avtomatty túrde tabý júıesiniń bolmaýy bolyp otyr.
«Birqatar nysandarda atalǵan kemshilikter birneshe jyldan beri oryn alýda. Bizdiń tarapymyzdan kemshilikterdi joıý týraly bergen usynystarymyz áli kúnge oryndalmaı keledi», - dedi mınıstr.
