Elimizdegi mektepterde kisi óltirgender de, pedofılder de jumys isteıdi
Bul týraly komıtettiń baspasóz qyzmetinen habarlady.
Qoldanystaǵy zańdarda buryn kámeletke tolmaǵandarǵa qatysty qylmystardyń belgili bir túrin jasaǵan, sondaı-aq sottylyǵy joıylmaǵan adamdardy bilim berý mekemeleri men uıymdaryna jumysqa alýǵa shekteý qarastyrylǵan.
Alaıda, kisi óltirgeni jáne jas balalardy zorlaǵany úshin buryn sottalǵan adamdardy orta mektepte jumysqa alý faktileri anyqtalyp, ol Bas prokýratýranyń Quqyqtyq statıstıka jáne arnaıy esepke alý jónindegi komıteti júrgizgen tekserýi arqyly toqtatyldy.
Ár ata-ananyń óz balasyn buryn qylmys jasaǵan adamnan aýlaqtaýǵa tyrysatyny jasyryn emes. Óz balalarynyń mektep qabyrǵasynda júrgenine sengen olardyń keıbir oqý oryndarynda osylaısha sottylyǵy joıylǵan nemese aqtalmaǵan negizde isi qysqarǵan buryn qylmystyń aýyr jáne asa aýyr túrlerin jasaǵan adamdar da jumys isteıtindiginen múldem habarsyz ekeni sózsiz.
Máselen, buryn jas balalardy zorlaǵan jáne olardy azǵyndyqqa baýlyǵan 4 adamnyń tikeleı balalarmen jumys isteıtini anyqtaldy. Tipti olardyń bireýi aýyl mektepteriniń birinde kitaphanashy bolsa, qalǵandary ǵımarattarǵa tehnıkalyq jaǵynan qyzmet kórsetýmen shuǵyldanatyn bolyp shyqty.
Tekserý kezinde qylmystyń basqa da túrlerimin sottalǵan 20-dan astam muǵalimniń sottylyǵynyń joıylmaǵany nemese alynbaǵany anyqtaldy.
Al buryn kisi óltirgen, áıel zorlaǵan, esirtki saqtaǵan jáne basqa da aýyr qylmys jasaǵan 60-tan astam adam sottylyǵy joıylǵannan keıin mektepterde jumys istep júrse, olardyń úshten biri tikeleı bala oqytýmen jáne tárbıeleýmen aınalysady.
Buryn kisi óltirgen osyndaı bir adam sottylyǵy joıylǵannan keıin tipti mektep dırektory bolyp otyr.
Bul rette mundaı jaǵdaıdyń oryn alyp otyrǵany jáne ondaılardyń elimizdiń ár aımaǵynda bar ekendigi alańdaýshylyq týdyrady. Bul tekserýlerge kolledjderdiń, kásibı mektepterdiń, balalardyń demalys jáne damytý, mádenıet mekemeleri, kámeletke tolmaǵandar qatysatyn basqa da uıymdar qyzmetkerleri qamtylmaǵanyn eskersek, mundaı mysaldardyń jalpy alǵanda qazir anyqtalǵannan áldeqaıda kóp ekenin ańǵarý qıyn emes.
Búgingi kúni Bas prokýratýranyń Quqyqtyq statıstıka jáne arnaıy esepke alý jónindegi komıtetinde qazirgi zańnamada sottylyǵy joıylǵan nemese alynǵan adamdar úshin tikeleı shekteý bolmaǵandyqtan Bilim jáne ǵylym mınıstrligi adresine osyndaı zań buzýshylyqtardy joıý jáne qoldanystaǵy zańnamaǵa, eskirý merizimine qaramastan balalarmen jumys isteýge kesel keltiretin qylmystar tizimin keńeıtýge bastamashylyq jasaý jóninde sharalar qabyldaý úshin aqparat jiberildi.
