Elimizdegi mektep oqýlyqtarynyń mazmuny jańartyldy - BǴM
ASTANA. QazAqparat - Elimizdegi mektep oqýlyqtarynyń mazmuny jańartyldy. Bul týraly búgin Ortalyq kommýnıkatsııalar qyzmetinde ótken brıfıngte QR Bilim jáne ǵylym mınıstrligi Bilim berý jáne ǵylym salasyndaǵy baqylaý komıtetiniń tóraǵasy Saıat Núsipov málim etti. Brıfıngte óńirlerdegi mektepterdiń oqý jylyna daıyndyǵy týraly másele qaralǵan bolatyn.
«Bizdiń elimizdegi mektepterde barlyq oqýlyqtar árbir tórt jyl saıyn qaıta basylady. 2012 jyly qabyldanǵan QR Memlekettik jalpyǵa mindetti bilim berý standarttaryna sáıkes, qazirgi tańda 2,3,4,5,6,9,10,11 synyptarǵa arnalǵan oqýlyqtardyń mazmuny jańartylǵan. 2016-2017 oqý jyldarynda 7 synyptyń oqý quraldarynyń mazmuny tolyǵymen jańartylady. Osylaısha, 2012 jyly qabyldanǵan standarttar arqyly oqýlyqtar mazmuny tolyqtaı jańartylady», - dedi S.Núsipov.
Onyń aıtýynsha, oqýlyqtardy tekserýmen aınalysatyn respýblıkalyq komıssııa aıasynda 20 pándik komıssııa qurylǵan. Al pándik komıssııa jetekshisi respýblıkalyq komıssııa quramyna enedi, sosyn ol respýblıkalyq komıssııa aldynda tikeleı jaýapty bolyp, komıssııa aldynda saraptamanyń sapaly jasalǵanyn qorǵaıtyn bolady.
«Eger buǵan deıin respýblıkalyq komıssııa quramy 44 adamnan turǵanymen (memlekettik organ basshylary, máslıhat múshleri, respýblıkalyq qoǵamdyq birlestikter ókilderi, sarapshylar), ishki saraptamalyq top bolmaǵan edi. Sondyqtan da, onyń tıimdiligi bolmaǵan. Endi jaǵdaıdy ózgertýge barlyq múmkindik bar», - dedi S.Núsipov.
