Elimizdegi mamandandyrylǵan HQKO qyzmeti Ahýaldyq ortalyq arqyly baqylanady
ASTANA. QazAqparat - Búgingi kúni júrgizýshi kýáligin berý jáne avtotransport quralyn tirkeý/qaıta tirkeý, nómirlik belgi berý sekildi memlekettik qyzmetterdi usynatyn elimizdiń mamandandyrylǵan halyqqa qyzmet kórsetý ortalyqtary Ahýaldyq ortalyqqa qosylǵan.
Bul týraly QR Baılanys jáne aqparat agenttiginiń baspasóz qyzmetinen habarlady.
Ahýaldyq ortalyq qyzmetkerleri beınebaqylaý kameralarynyń kómegimen mamandandyrylǵan HQKO qyzmetkerleriniń jumysyn baqylap otyrady. Atap aıtqanda, ortalyqqa kelgen klıentterdiń kezek kútý ýaqyty, olarǵa qyzmet kórsetý ýaqyty, berilgen júrgizýshi kýálikteriniń sany, klıentterdiń HQKO ınspektorynyń qyzmetine bergen baǵasy - barlyǵy baqylaýǵa alynǵan. Memlekettik qyzmet kórsetý protsesine monıtorıng júrgizý barysynda «HQKO» yqpaldastyrylǵan aqparattyq júıesi basty rol atqarady. Atalǵan júıe HQKO-nyń jáne Ákimshilik polıtsııa qyzmetkerleriniń memlekettik qyzmetti belgilengen ýaqytynda kórsetýin qadaǵalaýǵa múmkindik beredi. Mysaly, teorııalyq jáne praktıkalyq emtıhan tapsyrý ýaqytyn qosa eseptegende, júrgizýshi kýáligin berýge 2 saǵat ýaqyt ketedi, eger osy ýaqyt ishinde emtıhan tapsyrýshy kýáligin almaǵan jaǵdaıda, Ahýaldyq ortalyq qyzmetkerleri onyń sebebin anyqtaıtyn bolady. Eger qyzmet kórsetý ýaqyty HQKO qyzmetkeriniń tarapynan keshiktirilgen bolsa, mundaı jaǵdaıda qyzmetkerge tártiptik shara qoldanylatyn bolady. Eger qyzmet kórsetý ýaqyty polıtsııa qyzmetkerleriniń tarapynan keshiktirilgen bolsa, bul jaǵdaıda beınebaqylaýǵa jazylǵan málimet Ákimshilik polıtsııa basshylyǵyna usynylady. QR Baılanys jáne aqparat agenttigi men QR Іshki ister mınıstrliginiń birlesken jumysy nátıjesinde keshiktirilgen qujat sany aıtarlyqtaı azaıdy. Búginde bul kórsetkish barlyq rásimdelgen qujat sanynyń 5%-dan aspaıdy, al ótken jyldyń atalǵan merziminde bul kórsetkish 27%-dy quraǵan edi. «Memlekettik qyzmetti alý ýaqyty azamattyń talon alǵannan bastap daıyn qujatty alǵanǵa deıingi ýaqyt aralyǵynda esepteledi. Osy ýaqyt aralyǵynda Ahýaldyq ortalyq qyzmetkerleri azamattyń emtıhan tapsyrý zalynda qansha ýaqyt otyrǵanyn, praktıkalyq emtıhandy tapsyrýǵa qansha ýaqyt jumsaǵanyn jáne júrgizýshi kýáligin ázirleýge qansha ýaqyt ketkenin kórip otyrady», - dep atap ótti «HQKO» RMK Bas dırektorynyń orynbasary Ásemgúl Baltasheva. Mamandandyrylǵan HQKO-daǵy qyzmetkerlerdiń atqaratyn mindetteri ózara bólingenin aıtyp ótý kerek. HQKO qyzmetkerleri tek qujattardy qabyldaıdy, al QR Іshki ister mınıstrliginiń qyzmetkerleri kólik agregatyn tekserý, kólik quraldaryn tirkeý, júrgizýshi kýáligin ázirleý protsesine qatysady. Sóz oraıy kelgende aıtyp ótý kerek, ótken aptada QR ІІM Ákimshilik polıtsııasynyń óńirlik bólim basshylary Ahýaldyq ortalyqtyń múmkindikterimen tanysty. Búgingi kúni Ahýaldyq ortalyqqa 162 Halyqqa qyzmet kórsetý ortalyǵy, sonyń ishinde Astana, Almaty, Qaraǵandy, Aqtaý jáne Taraz qalalaryndaǵy mamandandyrylǵan HQKO qosylǵan. 2014 jyldyń sońyna deıin Qyzylorda, Petropavl, Pavlodar jáne Taldyqorǵan qalalarynda mamandandyrylǵan HQKO iske qosý kózdelýde.
