Elimizdegi mal sharýashylyǵymen aınalysatyn fermerler sanyn arttyrý qajet - «Mal ónimderi» korporatsııasynyń Basqarma basshysy
ASTANA. Maýsymnyń 1-i. QazAqparat /Qanat Mámetqazyuly/ -. Qazaqstanda mal sharýashylyǵymen aınalysatyn 16 myńǵa tarta fermer ǵana bar.
Al elimizdiń bul baǵyttaǵy áleýetin arttyrý úshin bulardyń sanyn da edáýir ósirý kerek. Búgin QR Parlamenti Senaty Agrarlyq máseleler jáne qorshaǵan ortany qorǵaý komıtetiniń depýtattarymen kezdesýi barysynda «Mal ónimderi» korporatsııasynyń Basqarma basshysy Aleksandr Selıýlev osylaı málim etti, dep habarlaıdy QazAqparat.
Basqarma tóraǵasynyń aıtýynsha, mal sharýashylyǵy salasy boıynsha etti maldy damytý baǵyttarynda birqatar problemalar qordalanyp otyr.
«Qazirgi tańda múıizdi iri qara maldyń 80 paıyzynan astamy jeke sharýashylyqtarda. Sonymen birge, maldy esepke alýdyń biregeı teńdestirilgen júıesi áli de qoldanylmaıdy. Budan bólek, asyl tuqymdy mal basynyń úlesi, genetıkalyq áleýetti deńgeıi de tómen. Sonyń saldarynan elimizdegi et ónimdiliginiń deńgeıi quldyraǵan. Máselen, mal soıýdan shyǵatyn tutastaı ettiń salmaǵy 130 keliden, arakidik 150 keliden asady. Bul álemdik deńgeı boıynsha eń tómengi kórsetkish bolyp otyr», dedi A. Selıýlev.
Osy rette Basqarma tóraǵasy etti mal sharýashylyǵyndaǵy problemalardyń birqatary jem-jóp ázirleý salasyna da qatysty ekendigin jetkizdi. Máselen, sońǵy jyldary etti mal sharýashylyǵyndaǵy oryn alǵan problemalardyń saldarynan jem-shóp ázirleý barysy da nazardan tys qalǵan.
«Qazaqstan fermerler odaǵynyń esebi boıynsha búgingi kúni elimizde mal sharýashylyǵymen aınalysatyn 16 myńǵa tarta fermer ǵana bar eken. Árıne, keń baıtaq Qazaqstannyń aýmaǵynda bul saladaǵy qojalyqtar sany budan áldeqaıda kóp bolýy tıis. Sondyqtan da, mal sharýashylyǵyna qyzyǵýshylyqty arttyrý, memlekettik qoldaý asa qajet. Mysal retinde aıtatyn bolsaq, AQSh-ta 900 myń fermer bolsa, olar bordaqylaýǵa jyl saıyn 20-25 mln. iri qara mal ótkizip otyrady», dedi Basqarma basshysy.
