Elimizdegi krımınogendik ahýal jalpy ýshyqpaǵanymen, qylmystar sany ósip otyr - Prokýratýra

ASTANA. 1 tamyz. QazAqparat - 2013 jyldyń 7 aıynda elimizdegi tirkelgen qylmystar deńgeıi ótken jyldyń osyndaı kezeńimen salystyrǵanda 31,2 paıyzǵa ósti. Naqtylap aıtqanda, byltyrǵy tirkelgen qylmystar 160 myń 308 bolsa, bıyl 210 myń 249-ǵa jetip otyr. Bul týraly búgin Bas prokýratýrada ótken brıfıng barysynda málim boldy.

Resmı málimetterge qaraǵanda, elimizdegi qylmystyń ósýi bótenniń múlkin urlaý, alıaqtyq, buzaqylyq sııaqty qylmystardyń esebinen oryn alǵan. Óıtkeni qylmystardyń osy túrleri jalpy tirkelgen qylmystylyqtyń 75 paıyzyn quraıdy. Al qylmystardyń quramyndaǵy asa aýyr qylmystar úlesi - 0,8 paıyzdy, aýyr qylmystar - 10,7 paıyzdy, aýyrlyǵy ortasha qylmystar 76,0 paıyzdy, aýyr emes qylmystar 12,5 paıyzdy quraǵan. Budan bólek, qylmystylyqtyń ósýi elimizdiń barlyq óńirlerinde baıqalǵan. Al eń kóbi Astana qalasynda jáne Aqtóbe, Mańǵystaý men Pavlodar oblystarynda tirkelip otyr.

Osy ýaqyt ishinde asa aýyr qylmystar 11,6 paıyz jáne kisi óltirý 13,7 paıyzǵa tómendegen. Endeshe elimizdegi krımınogendik ahýal jalpy alǵanda ýshyqqan joq dep aıtýǵa tolyq negiz bar. Óıtkeni qylmystylyqtyń negizgi kórsetkishin osy qylmys túrleri quraıdy.