Elimizdegi kórikti jerlerdiń vıdeosyn túsirgen qazaqstandyq 2 mln teńge utyp ala alady
ASTANA. QazAqparat - «Qazkontent» AQ ishki týrızmdi damytýǵa baǵyttalǵan júlde qory 2 mln teńge quraıtyn baıqaý jarııalady, dep habarlaıdy QazAqparat tilshisi.
«Týǵan jerim - altyn besigim» atty vıdeobaıqaýǵa kez kelgen adam qatysa alady. Shartqa sáıkes qatysýshy týǵan jeriniń tabıǵaty men elimizde týrızmdi damytý taqyrybynda 3 mınýttan aspaıtyn vıdeo túsirip, ony jeke áleýmettik paraqshasyna (Instagram, Facebook) #qazcontentkonkurs2018 jáne #konkurs_s_qazcontentom heshtegteri arqyly jarııalaýy tıis.
Osy jyldyń 30 qazanynda bastalǵan vıdeobaıqaý 7 qarashaǵa deıin jalǵasady.
Júlde qory 2 mln teńgeni quraıtyn baıqaýdyń nátıjesi 12 qarasha kúni jarııalanady.
Jeńimpazdardy anyqtaý jarııalanǵan vıdeonyń «laık» jınaýyna baılanysty anyqtalady, ıaǵnı qaısy vıdeo kóp «laık» jınady, sonyń ıesi jeńimpaz atanady. Marapattaý rásimi 16 qarasha kúni Astanada ótedi.
Aıta keterligi, Qazaqstanǵa saıahattaıtyn eýropalyqtardyń úshten bir bóligi - polıaktar ekeni belgili boldy. Sondaı-aq taıaýda Shveıtsarııanyń qazaqstandyq taý gıdteri, shańǵy nusqaýshylarynyń standarttaryn jasaýǵa kómektesetini málim etildi.
