Elimizdegi kóppáterli turǵyn úılerdiń 28 paıyzy kúrdeli jóndeýdi qajet etedi

ASTANA. QazAqparat - Elimizdegi kóppáterli turǵyn úılerdiń 28 paıyzy kúrdeli jóndeýdi qajet etedi. Bul týraly búgin Májiliste «Nur Otan» parlamenttik fraktsııasy janyndaǵy Óńirlik saıasat jáne máslıhattarmen jumys jónindegi keńesiniń keńeıtilgen otyrysynda Ulttyq ekonomıka vıtse-mınıstri Qaıyrbek Óskenbaev málim etti. Eske salaıyq, jıynda elimizdegi turǵyn úı-kommýnaldyq sharýashylyǵyn jańǵyrtý barysy talqylanǵan bolatyn.

«Turǵyn úı-kommýnaldyq sharýashylyǵyn jańǵyrtý baǵdarlamasynyń birinshi kezeńinde 2015 jylǵa deıin mynadaı nysanaly kórsetkishterge qol jetkizý kózdeledi: kondomınımým nysandarynyń úlesin 32-den 22 paıyzǵa azaıtý; 24 400 shaqyrym jelilerdi jańǵyrtý; árbir óńirde kommýnaldyq qyzmet sapasymen qanaǵattandyratyn tutynýshylar sany 50 paıyzdan kem bolmaýy kerek», - deıdi Q. Óskenbaev.

Onyń aıtýyna qaraǵanda, baǵdarlama eki baǵytty qamtıdy: turǵyn úı jáne kommýnaldyq sektor.

«Jalpy elimizde 105 122 kóppáterli turǵyn úı bar. Al onyń kúrdeli jóndeýdi talap etetini 29 751 úıdi nemese 28 paıyzdy quraıdy. Al apatty jaǵdaıda turǵan buzýǵa jatatyn úıler - 3 807 nemese 3,6 paıyzdy qurasa, 68 paıyzynyń nemese 71 560 úıdiń jaǵdaıy tıisti deńgeıde», - dedi vıtse-mınıstr.

Toqtala ketetin jaıt, apatty jaǵdaıdaǵy úılerdi buzý jónindegi ilki joba aıasynda Astanada 2013 jyly 20 mlrd. teńge qarastyrylyp, oǵan jańadan 23,4 myń páter turǵyzylǵan. 2014 jyly 68,7 myń páter qoldanysqa berý kózdeledi.