Elimizdegi kópir qurylystarynyń elektrondyq katalogi jyl sońyna deıin paıdalanýǵa beriledi
Qazaqstanda avtomobıl kópirleriniń tsıfrlyq bazasyn qurý jumystary jalǵasýda. Osylaısha «Kópirlerdi paıdalanýdy basqarý júıesi» (SÝEM) respýblıkadaǵy ınjenerlik qurylystar týraly aqparatty júıelep, elektrondyq formatqa aýdarýǵa arnalyp otyr.
Búgingi tańda baǵdarlamanyń prototıpi jasalyp, júıeni toltyrý úrdisi bastalyp ketken. Qazirgi kezeńde elektrondyq bazaǵa Aqmola, Almaty, Jambyl, Pavlodar, Soltústik Qazaqstan jáne Túrkistan oblystaryndaǵy 20 kópirdi zertteý nátıjeleri engizý josparda bar.
«Baǵdarlamanyń algorıtmderin synaý maqsatynda jaǵdaıy nashar avtomobıl kópirleri tańdaldy. Júıe tolyǵymen daıyn bolǵan soń sarapshylar qalǵan nysandar týraly aqparatty engize bastaıdy. Qazaqstanda respýblıkalyq mańyzy bar joldarda jalpy 1,5 myńǵa jýyq kópir qurylysy bar. Olardyń barlyǵy keıinnen tsıfrlandyrylatyn bolady. Biz atalǵan júıeni bıyl jeltoqsanda iske qosýdy josparlap otyrmyz», dedi «QazjolǴZI» AQ Avtojoldar jáne kópir qurylystary departamentiniń bas mamany Qaısar Shalqar.
Onyń aıtýynsha, jol paıdalanýshylaryna árbir qurylys týraly barlyq qajetti derek, onyń ishinde jobalaý-tehnıkalyq sıpattamalary, tehnıkalyq jaı-kúıin baǵalaý, anyqtalǵan deformatsııalar men júrgizilgen jóndeý jumystary týraly ózekti málimetter qoljetimdi bolady.
Bul joba kópir konstrýktsııasy elementteriniń jaı-kúıimen egjeı-tegjeıli tanysý múmkindigimen kópirlerdiń tsıfrlanǵan syrtqy túrin sıpattaıdy. Baǵdarlama avtorlary 3D beıne túsirýdi arnaıy drondardyń kómegimen júrgizýdi josparlap otyr.
Sonymen qatar SÝEM ár obekt boıynsha esepterdi avtomatty túrde qalyptastyrý múmkindigine ıe bola otyryp, reglamenttik nemese kúrdeli jóndeý merzimderiniń jaqyndaýy týraly, sondaı-aq osyndaı jumystardyń bıýdjetin josparlaı alady.
Elektrondyq katalog sııaqty zamanaýı tsıfrlyq servıs birqatar mindetti tıimdi sheshýge múmkindik beredi. Atap aıtqanda, bul shara muraǵattardaǵy derekterdiń bytyrańqylyǵy men tártipsizdigi, qujattardyń joǵalýy syndy máselelerdiń aldyn alýǵa múmkindik beredi.
Sonymen birge bul elektrondyq júıe memlekettik organdar, jol paıdalanýshylar, jol-qurylys jáne jobalaý uıymdary, sondaı-aq gabarıtti emes júkterdi tasymaldaýmen aınalysatyn kólik kompanııalary jıi talap etetin aqparatty izdeý úrdisin jeńildetedi jáne olarmen jasalatyn jumysty aıtarlyqtaı jedeldetedi.
Óz kezeginde aqaýlardy ýaqtyly baıqaý jáne olardy joıý múmkindigi kópirlerdi kútip ustaý shyǵyndaryn azaıtýǵa jáne apattar men tótenshe jaǵdaılardy azaıtýǵa múmkindik beredi.