Elimizdegi kópbalaly analar men zeınetker áıelderdiń sany belgili boldy

ASTANA. QazAqparat - «Azamattarǵa arnalǵan úkimet» memlekettik korporatsııasy halyqaralyq áıelder kúni qarsańynda qyzyqty statıstıkalyq kórsetkishterdi usyndy, dep habarlaıdy QazAqparat.

Korporatsııa baspasóz qyzmetiniń málimetinshe, byltyrǵy 8 naýryzdan búginge deıin halyqqa qyzmet kórsetý ortalyqtaryna 13 mıllıonnan astam áıel adam júgingen.

«Azamattarǵa arnalǵan úkimet» halyqqa 620-dan astam qyzmet kórsetedi. Kún saıyn front-ofısterge Qazaqstan boıynsha júz myńnan astam adam júginedi. Onyń jartysynan kóbi áıelder.

Mysaly, atalǵan merzim ishinde berilgen elektrondyq-tsıfrlyq qoltańbanyń 53 paıyzy, ıaǵnı eki mıllıonnan astamy qyz-kelinshekterge tıesili.

Avtokólikterge qatysty qujattar jónindegi kórsetkishterge kelsek, mamandandyrylǵan HQO arqyly berilgen júrgizýshi kýáliginiń 25 paıyzy, ıaǵnı 96 myńnan astamy áıel azamattardyń enshisinde. Al 337 myńǵa jýyq názik jandy kólik menshiktegen qujat alǵan.

Aıta keterligi, qazirgi tańda elimizde 236 myńnan astam kópbalaly ana bar. Sondaı-aq 303 508 ana bir jasqa deıingi bala kútimi boıynsha járdemaqy, al 1 525 818  áıel adam zeınetaqy alyp otyr.