Elimizdegi kommýnaldyq ınfraqurylym nysandarynyń tozý deńgeıi orta eseppen 70 paıyzdy quraıdy

Búgin QR Parlamenti Májilisinde ótken Úkimet saǵatynda QR Qurylys jáne turǵyn úı-kommýnaldyq sharýashylyq isteri agenttiginiń tóraǵasy Serik Nokın osylaı málim etti, dep habarlaıdy QazAqparat.

Agenttik tóraǵasynyń aıtýynsha, ınfraqurylym ishindegi eń tozyǵy jetken tazartý qurylǵylarynyń deńgeıi 74 paıyz bolsa, jylytý jelileri 73 paıyzdy qurap otyr. «Injenerlik jelilerdiń tozyǵy jetkendikten resýrstyq mol shyǵyndar da oryn alýda. Atap aıtqanda, jylý energııasynyń shyǵyndary ortasha eseppen 35 paıyzǵa deıin jetse, sýmen qamtamasyz etý shyǵandary 32 paıyzdan astam bolýda. Sondyqtan da, aldaǵy ýaqyttaǵy bizdiń jumysymyz, eń aldymen ınjenerlik jeliler men qurylǵylardyń tehnıkalyq jaı-kúıin jaqsartýǵa, sondaı-aq energııany jáne resýrstardy únemdeıtin tehnologııalardy engizýdi qamtýǵa baǵyttalmaq», dedi S. Nokın.

Onyń sózine qaraǵanda, atalǵan másele boıynsha Turǵyn úı-kommýnaldyq sharýashylyǵyn jańǵyrtý men damytýdyń 2010-2014 jyldarǵa arnalǵan tujyrymdamasy bekitilgen. Bul tujyrymdama boıynsha turǵyn úı-qommýnaldyq salany damytýǵa aldaǵy 5 jyldyń ishinde 300 mlrd. teńge bólinedi. Bunyń ishinde 200 mlrd. teńge respýblıkalyq bıýdjetten qarastyrylyp otyr. Bólingen qarajattyń negizgisi ınjenerlik jelilerdi salýǵa jáne jóndeýge jumsalatyn bolady.