Elimizdegi keıbir mektepterde oqýshylardyń salaýatty ómir saltyn saqtaýlaryna jetkilikti deńgeıde jaǵdaı jasalmaǵan - Bas prokýratýra
ASTANA. Naýryzdyń 4-i. QazAqparat /Aıdar Ospanalıev/ - Elimizdiń keıbir orta bilim berý oryndarynda oqýshylardyń salaýatty ómir saltyn saqtaýlaryna jetkilikti deńgeıde jaǵdaı jasalmaǵan.
Atalmysh másele boıynsha elde arnaıy tekserý jumystaryn júrgizgen Bas prokýratýra ókilderi osyndaı baılamǵa kelip otyr. Bul týraly búgin jýrnalıstermen bolǵan brıfıngte Bas prokýratýranyń resmı ókili Nurdáýlet Súıindikov málim etti, dep habarlaıdy QazAqparat.
«Memleket basshysynyń qoǵamymyzda salaýatty ómir saltyn qalyptastyrýǵa erekshe kóńil bólip otyrǵany barshaǵa málim. Al bul mindetti talapqa saı atqarý úshin dene shynyqtyrý jáne sport salasyndaǵy memlekettik saıasatty turaqty júzege asyrý qajet. Prokýratýra organdary osy maqsatpen arnaıy tekserý júrgizdi.
Al onyń nátıjesi elde aptasyna eń keminde 3 saǵat dene shynyqtyrý jumystaryn júrgizý jónindegi talaptardyń tıisinshe oryndalmaıtyndyǵyn kórsetti. Sondaı-aq múmkindigi shekteýli balalardyń arnaıy medıtsınalyq toptarda sportpen shuǵyldanýy jónindegi quqyqtary da saqtalmaıdy», dedi resmı ókil.
Ol taratqan málimetter boıynsha, eldegi mektepterdegi sport zaldardyń jaǵdaıy talapqa saı emes. Al endi bireýlerinde mundaı zaldar múldem joq. Barlarynyń ózinde sporttyq qurylǵylar jetispeıdi. Al dene shynyqtyrý páninen arnaıy pedagogıkalyq bilimi joq azamattar sabaq berip júr. «Mysaly Jambyl oblysynyń Talas aýdanynda 29 mekteptiń 16-ynda sportzal joq. Ókinishtisi, bul másele qazir tek aýyldyq aımaqtarda ǵana ózekti bolyp otyrǵan joq. Qyzylorda qalasyndaǵy 4 mektep apatty jaǵdaıda tur. Al taǵy
6 mektepte sport zalyn salý máselesi josparda da bolmaǵan.
