Elimizdegi qazaq tildi alǵashqy sport saıtyna bir jyl toldy
ALMATY. 18 qarasha. QazAqparat /Erbol Turymbetov/ - Byltyr 19 qarasha kúni ashylǵan «Alaman» ulttyq elektrondy basylymy elimizdegi alǵashqy qazaq tildi elektrondy sport portaly bolyp tabylady.
Erteń 1 jyldyǵyn atap ótkeli otyrǵan saıt (www.alaman.kz) qazaqstandyq eń úzdik 5 sporttyq saıttardyń qatarynda sanalady. Bir jylda elimizdiń BAQ-tary arasynda óz bedelin qalyptastyryp úlgergen «Alamannyń» búginde 7 oblyspen birge, Almaty jáne Astana qalalarynda menshikti tilshileri bar. Saıt ıeleriniń málimetteri boıynsha, «Alamandy» bir kúnde 700 astam oqyrman qaraıdy. Al Vankýverdegi qysqy Olımpıada kezinde saıtqa bir mezgilde 4 myńnan astam oqyrmannyń enýi tirkelgen.
Jalpy, 1 jyldyń ishinde 1 mıllıon 648 myń oqyrman saıtqa kirgen. «Alaman» álemdik iri syndardan óz oqyrmandaryna onlaın kórsetilimderdi jıi usynyp keledi. Máselen, fýtboldan Qazaqstan chempıonatynyń oıyndary men aýyr atletıkadan Túrkııada ótken álem birinshiliginen tikeleı taza qazaq tilinde onlaın kórsetilim usyndy. Bul buryn-sońdy qazaq sport jýrnalıstıkasynda bolmaǵan jaıt.
Qazir «Alaman» elimizde ótetin VII qysqy Azııa oıyndaryna daıyndalýda. «Biz aldaǵy Azıada kezinde sporttyq syndardan tek aqparat taratyp qana qoımaı, qazaq tilinde tikeleı onlaın kórsetilimder jasaýdy josparlap otyrmyz. Jáne bir maqtanyshymyz, «Alamannyń» tek Qazaqstanda ǵana emes, Qytaı, Reseı, AQSh, Anglııa, Shvetsııa, Ispanııa, Katar, Polsha, Norvegııa, Koreıa, Avstralııa elderinde de turaqty oqyrmandarymyz bar», -deıdi saıttyń bas redaktory Raýan Oqas.
