Elimizdegi qant zaýyttary jańǵyrtylmaq
Mınıstr Qazaqstannyń ońtústik óńirlerine (Almaty, Túrkistan jáne Qyzylorda oblystary) jumys sapary aıasynda Almaty oblysynyń qant jáne qant qyzylshasyn óndirýshilermen kezdesti. Kezdesý Kóksý qant zaýyty bazasynda ótti, onda mınıstrge qaıta óńdeý jelisi kórsetilip, jańǵyrtý jumystary jáne óndiristi ulǵaıtý josparlary týraly aıtyldy.
Qant qyzylshasyn óndirýshilermen kezdesý kezinde Erbol Qarashókeev qant salasyn damytý úshin mınıstrlik egis alqaptaryn ulǵaıtýdy yntalandyratynyn, aýyl sharýashylyǵy taýaryn óndirýshilerge tuqym, tyńaıtqyshtar men gerbıtsıdter, tehnıka satyp alýǵa jumsalǵan shyǵyndardy óteý kózdelgenin aıtty. Sondaı-aq, salany tehnologııalyq qaıta jaraqtandyrý úshin ınvestıtsııalyq sýbsıdııalar men aınalym qarajatyn tolyqtyrýǵa jeńildikti kredıt beriletinin atap ótti.
AÓK damytý jónindegi ulttyq jobaǵa sáıkes, qolda bar qant zaýyttaryn jańǵyrtý jáne otandyq qantpen qamtamasyz etilý deńgeıin 80% deıin arttyrý josparlanyp otyr.
Atalǵan máseleni jan-jaqty sheshý úshin mınıstrlik Premer-Mınıstrdiń tapsyrmasy boıynsha qant jáne qant qyzylshasyn óndirý tujyrymdamasyn ázirleýge kiristi.
Óz kezeginde óndirýshiler taýarlyq-materıaldyq qundylyqtar baǵasynyń ósýine, otandyq shıkizat óndirisiniń kólemin ulǵaıtýǵa, sý únemdeý tehnologııalaryn engizýge qatysty suraq qoıdy.
Kezdesý qorytyndysy boıynsha qant jáne qant qyzylshasyn óndirýshiler ózderiniń naqty usynystaryn daıyndaýǵa kelisti. Mınıstrlik ony muqııat qarap, qajet bolǵan jaǵdaıda qant jáne qant qyzylshasyn óndirý tujyrymdamasynyń jobasyna engizetin bolady.
Vedomstvo basshysy «Hılnıchenko jáne K» komandıttik seriktestiginde bolyp, dıirmendi, sút-taýar fermasyn jáne qaıta óńdeý tsehtaryn aralap kórdi. Sonymen birge fermerlermen kóktemgi egis jumystaryna daıyndyq máselelerin, salany damytýdy, mınıstrliktiń aralasýyn talap etetin aǵymdaǵy júıeli problemalardy talqylady.
Mınıstrdiń ońtústik óńirlerge jasalǵan úsh kúndik jumys saparynyń qorytyndysy Úkimetke jetkizilip, agroónerkásiptik keshendi odan ári damytý boıynsha usynystar muqııat taldanyp, daıyndalatyn bolady.
