Elimizdegi qaharmandyq ataǵyna laıyq tulǵalar «Birligimiz jarasqan» ulttyq syılyǵymen marapattalady
«Respýblıka boıynsha 4 aı boıy áleýmettik áriptestikti nyǵaıtyp, el ıgiligi úshin birlesip eńbek etýge baǵyttalǵan «Birligimiz jarasqan» sharasy aıasynda túrli ıgilikti jobalar, jumystar, bastamalar júrgizilýde. Biz qarapaıym qazaqstandyqtardyń jasalyp jatqan atalǵan isterin bir úlken ári mańyzdy áleýmettik baıqaýǵa biriktirýdi sheshtik. Bul baıqaýdy biz «Birligimiz jarasqan» ulttyq syılyǵy» dep atadyq», deıdi Qazaqstannyń azamattyq alıansy uıymynyń dırektory Alına Hamatdınova.
«Búgin bul baıqaýǵa start beremiz. Biz úlgi bolarlyq neǵurlym kóp adamdardy, qaharmandardy izdeımiz. Bizdiń aramyzda qoǵamǵa jaǵymdy, mańyzdy ispen aınalysatyn adamdar bar. Bizdiń árqaısysymyzdyń jadymyzda erlikke nemese bıik adamgershilikke jatatyn úlken ister jasaǵan áriptesterimiz týraly ańyzdar saqtaýly. Adamdar osy ózderiniń oqıǵalaryn jazyp, qaharmandardy syılyqqa usyna alady», dep atap kórsetti ol.
«Qarashanyń sońynda jýrnalıster, mýzykanttar men qoǵam qaıratkerleri múshesi bolyp tabylatyn qoǵamdyq keńes syılyqqa laıyqty abzal jandardy tańdap, olardy Qazaqstannyń patrıottary, azamattyq qaharmandar dep ataıdy», dedi A. Hamatdınova.
Syılyqty uıymdastyrýshylardyń biri Qoǵamdyq saıasatty damytý ınstıtýtynyń dırektory Sholpan Baıbolovanyń aıtýynsha, syılyq aqshalaı emes. Jeńimpazdarǵa syılyqtyń aıshyqty rámizi Astanada saltanatty jaǵdaıda tabystalady.
«Baıqaý laýreattary 7 -eý bolady dep josparlanýda. Oǵan óz salasynda erlik jasaǵan azamattar ıe bolady. Biz olardyń jasyna, ultyna, dinine, áleýmettik jaǵdaıyna qaramaımyz. Biz ol adamdardyń saıasatkerler, juldyzdar jáne shen-shekpendilerdiń arasynan emes, aımaqtardaǵy qarapaıym halyqtyń arasynan shyqqandaryn qalaımyz», dep jalǵastyrdy Sh. Baıbolova.
Onyń aıtýynsha, árbir azamat qaharmanǵa laıyq dep tapqan dosyn, týysyn, tipti ózin ulttyq syılyqqa úmitker retinde usyna alady. Ol úshin Qoǵamdyq saıasatty damytý ınstıtýtynyń dırektory Sholpan Baıbolovanyń atyna hat jazýy kerek (e-mail: info@lichnost.kz ). Hatta usynylǵan adamnyń nelikten bul syılyqqa laıyqty tulǵa ekendigin, onyń erligi baıandalǵan áńgimesi tolyq jazylýy tıis.
