Elimizdegi iri kásiporyndar rekordtyq kólemde ónim óndirdi
ASTANA. QazAqparat - 2018 jyldyń qańtar-naýryzynda elimizdiń iri kásiporyndary jalpy somasy 7 trln teńgege ónim men qyzmettiń rekordtyq kólemin óndirdi, dep habarlaıdy QazAqparat finprom.kz saıtyna silteme jasap.
Esepti kezeńde Qazaqstannyń iri kásiporyndary ónimder men qyzmetter shyǵarý kólemin 2017 jyldyń sáıkes kezeńimen salystyrǵanda 24,3 paıyzǵa arttyrdy. Olar 5,6 trln teńgege ónimder men qyzmetter óndirdi.
Aǵymdaǵy jyldyń qańtar-naýryzyndaǵy óndiris kóleminiń basym bóligi taý-ken óndirý ónerkásibine (2,2 trln teńge, barlyq saladaǵy úlesi 31,7 paıyz), óńdeý ónerkásibine (1,3 trln teńge, 19,3 paıyz) jáne kólik-logıstıka sektoryna (977,4 mlrd teńge, 14 paıyz) tıesili. Basty úshtik sala óndirgen taýarlar men qyzmetterdiń jalpy kólemi 4,5 trln teńgeni qurady.
Óndirilgen ónimder men qyzmetter ósimimen birge aǵymdaǵy jyldyń 1 toqsanynda óndiristiń ózindik quny da 15,4 paıyz nemese 781,4 mlrd teńgege artty.
Tolyqtaı alǵanda, aǵymdaǵy jyldyń birinshi toqsanynyń qorytyndysynda iri kásiporyndardyń kirisi 12,1 trln teńgege jetip otyr. Bul ótken jyldyń sáıkes kezeńindegi kórsetkishten shırek ese artyq. Qazaqstannyń iri bıznesiniń jıyntyq jalpy kirisi osy jyldyń qańtar-naýryzynda 3,7 trln teńgeni qurady. Ol osydan bir jyl burynǵy toqsandaǵy kórsetkishten 23,9 paıyzǵa nemese 3 trln teńgege kóp.
Jalpy kiris kólemi boıynsha Atyraý oblysy kósh basynda keledi. Óńir kiris kólemin 37,3 paıyzǵa arttyryp, 1,2 trln teńgege jetkizip otyr. Mundaı jaıt eń aldymen munaı ken oryndarynyń shoǵyrlanýymen jáne óńirde munaıdy óndirý men óńdeýge baılanysty. Almaty men Astana da kóshbasshylar qatarynda. Bul óńirlerdegi jalpy kiris kólemi sáıkesinshe 587,8 mlrd teńgeni (ósim 17,7 paıyz) jáne 353,5 mlrd teńgeni (11,3 paıyz) qurady.
