Elimizdegi iri qara maldyń 82 paıyzy ónimdiligi tómen ári jeke sharýashylyqtarda shoǵyrlanǵan bolyp otyr
ASTANA. 12 sáýir. QazAqparat /Qanat Mámetqazyuly/ - Qazaqstandaǵy iri qara maldyń 82 paıyzy ónimdiligi tómen, ári jeke sharýashylyqta shoǵyrlanyp otyr. Bul týraly búgin «QazAgroÓnim» Aktsıonerlik qoǵamynyń uıymdastyrýymen ótken baspasóz máslıhatynda málim boldy.
Toqtala ketetin jaıt, Elbasy aǵymdaǵy jylǵy Joldaýynda 2016 jylǵa qaraı elimizden eksporttalatyn iri qara mal etiniń kólemin 60 myń tonnaǵa, al 2020 jylǵa deıin 180 myń tonnaǵa jetkizý týraly mindet júktegen bolatyn. Osyǵan oraı, «QazAgro» Ulttyq basqarý holdıngi» AQ «Qazaqstan Respýblıkasynda iri qara mal etiniń eksporttyq áleýetin damytý» jobasyn ázirlegen bolatyn. Osy jobanyń birinshi kezeńi et baǵytyndaǵy joǵary ónim beretin asyl tuqymdy mal sanyn ulǵaıtý bolyp tabylady. «Qazir elimizde iri qara maldyń 82 paıyzynyń ónimi tómen ári olar jeke sharýashylyqtarda shoǵyrlanǵan. Sonyń saldarynan mamandandyrylǵan aýyl sharýashylyq kásiporyndary bolyp tabylmaıtyn, tek jeke qajettilikteri úshin ónimdi óndiretin shaǵyn sharýashylyqtar et ónimderin naryqqa jetkizýshilerge aınalyp otyr. Osy turǵydan aıta ketetin jaıt, bundaı jeke qosalqy sharýashylyqtardyń ónimderi syrtqy naryqtarda básekege qabiletti emes. Qalyptasqan jaǵdaıdy ózgertý úshin jáne etti mal sharýashylyǵyn damytý problemalaryn ońdy sheshý úshin joǵary ónimdi buqalardy qolda bar otandyq etti sıyrlarmen býdandastyrý jolymen etti iri qara mal sanyn ulǵaıtý bolyp tabylady. Budan bólek, aldaǵy ýaqytta etti mal sharýashylyǵyn damytý boıynsha 72 myńǵa jýyq asyl tuqymdy mal basy ákelinedi», - dedi baspasóz máslıhaty barysynda «QazAgroÓnim» AQ Basqarma basshysynyń keńesshisi Ońǵar Daýylbaev.
