Elimizdegi iri qara mal basynyń ónimdik kórsetkishi óte tómen bolyp otyr
ASTANA. 12 sáýir. QazAqparat /Qanat Mámetqazyuly/ - Elimizdegi iri qara mal basynyń ónimdik kórsetkishi óte tómen deńgeıde bolyp otyr. Bul týraly búgin «QazAgroÓnim» Aktsıonerlik qoǵamynyń uıymdastyrýymen ótken baspasóz máslıhatynda atalmysh kompanııanyń basqarma tóraǵasynyń orynbasary Aıgúl Ahmetjanova málim etti.
«Búgingi kúni Elbasynyń Joldaýynda júktegen mindetterdi júzege asyrý úshin aýyl sharýashylyǵy salasynda taýarly mal sharýashylyǵyn damytý eń ózekti másele bolyp tabylady. Onyń ishinde otandyq, ózimizdiń asyl tuqymdy mal basyn arttyrýǵa kóbirek kóńil bólinedi. Ókinishke qaraı, statıstıkalyq málimetterge súıensek, elimizde iri qaranyń etti baǵyttaǵy mal basy jalpy iri qara sanynyń 2 paıyzyn ǵana quraıdy. Al álemdik et óndirýshi memleket bolyp tabylatyn AQSh, Kanada, Avstralııa sekildi elderde bul kórsetkish 60-70 paıyzdy quraıdy. Dál osyndaı paıyzdyq úleste mal sharýashylyǵynyń tıimdiligi artady», - dedi «QazAgroÓnim» AQ Basqarma bastyǵynyń orynbasary Aıgúl Ahmetjanova. Onyń aıtýynsha, Qazaqstandaǵy iri qaranyń negizgi bóligi sútti baǵytty quraıdy. Áıtse de, bul baǵyttaǵy ónimdiliktiń de kórsetkishi tómendep ketken. Máselen, Qazaqstanda bir iri qaradan alynatyn sút shamamen jylyna 2,5 myń lıtrdi ǵana qurap otyr. «Árıne, bul óte tómen kórsetkish, bundaı jaǵdaıda iri qarany sútti malǵa jatqyzýǵa kelmeıdi. Alaıda, ondaı maldy etti baǵytqa jatqyzýǵa da bolmaıdy. Óıtkeni, resmı statıstıkalyq málimet boıynsha elimizdegi bir sıyrdyń soıylǵandaǵy salmaǵy 156 kelini ǵana quraıdy. Bul et óndirýshi elder arasyndaǵy eń tómen kórsetkish», - deıdi A. Ahmetjanova.
