Elimizdegi ǵalymdardyń 36 paıyzy - jastar

NUR-SULTAN. QazAqparat – Elimizdiń ǵylymı áleýetiniń tómendigi ǵalymdardyń jalaqysyna baılanysty boldy. Bul týraly búgin Úkimet otyrysynda QR Bilim jáne ǵylym mınıstri Ashat Aımaǵambetov aıtty, dep habarlaıdy QazAqparat tilshisi.

«Ǵylymı áleýettiń tómendigi ǵalymdardyń jalaqysyna baılanysty boldy. Ǵalymdarda turaqty jalaqy bolmady. Jalaqy úsh jylda bir ret qana ótkiziletin konkýrstarda jeńiske jetken jaǵdaıda ǵana tólenetin. Al ulttyq sıpattaǵy irgeli zertteýlermen, ıaǵnı, tilge, ádebıetke, tarıhqa, fılosofııaǵa qatysty zerteýlermen aınalysatyn ınstıtýttardyń jaǵdaıy múldem qıyn edi. Olar konkýrstardan grantty jetkilikti deńgeıge jeńbegenine baılanysty turaqty jalaqy men turaqty zertteýler júrgizýge múmkindik bolmady. Ǵalymdar bul máseleni uzaq jyldar kóterdi. Memleket basshysynyń Joldaýda bergen tapsyrmasynyń arqasynda «Ǵylym týraly» zańǵa ózgerister enip, bul másele tolyǵymen sheshimin tapty. Nátıjesinde tórt myńnan astam ǵalym turaqty jáne úzdiksyz jalaqy alatyn boldy. ıAǵnı, endi elimizge qajetti zertteýlerdi úzdiksiz ótkizetin múmkindik paıda boldy», - dedi ol.

Mınıstrdiń atap ótýinshe, elimizde 22 655 ǵylymı kadr bar. Onyń 36 paıyzy - 35 jasqa deıingi jas ǵalymdar, 39 paıyzy - orta jastaǵylar.

«ıAǵnı, aıtarlyqtaı ǵylymı áleýet bar. Biraq, ǵalymdardyń jalpy sanyn alsaq, elimizdiń bir mıllıon halqyna shaqqanda bir myńnan astam ǵana ǵalym keledi. Bul óz kezeginde qarjylandyrýǵa da baılanysty. Álemdik tájirıbede ǵylymdy qarjylandyrý kem degende jalpy ishki ónimniń bir paıyzy kóleminde bolý qajettigi aıtylady jáne onyń basym bóligi jeke ınvestıtsııadan qalyptasýy tıis. Osy baǵytta jumys júrgizip jatyrmyz», - dedi Ashat Aımaǵambetov.