Elimizdegi et eksporty áleýetin damytý baǵdarlamasyna aldaǵy 5 jylda 130 mlrd. teńge jumsaý kózdelýde

Bul týraly búgin «QazAgroÓnim» Aktsıonerlik qoǵamynyń uıymdastyrýymen ótken baspasóz máslıhatynda atalmysh kompanııanyń basqarma tóraǵasynyń orynbasary Aıgúl Ahmetjanova málim etti.

«Bul rette toqtala ketetin jaıt, atalǵan soma bul sýbsıdııa emes, nesıelik qaıtarymy qarastyrylǵan qarajat. ıAǵnı, qarajattyń basym bóligi jalpy negizdegi kepildikter boıynsha beriledi», - deıdi A. Ahmetjanova. Onyń aıtýynsha, atalǵan qarajat baǵytynda «Sybaǵa» baǵdarlamasy boıynsha fermerlik sharýashylyqtardy damytý maqsatynda qarjylandyrý sharalary júzege asady. Onyń ishinde asyl tuqymdy mal basyn shetelden ákelý, sondaı-aq jemshóp óndirisin damytý maqsatyndaǵy shyǵyndar da qarastyrylyp otyr. Jalpy, mamandardyń pikirinshe, qazirgi tańda Qazaqstan úshin et eksporty áleýetin ulǵaıtýdyń kóptegen múmkindikteri qalyptasyp otyr. Atap aıtqanda, qolaıly naryqtyq konıýktýra, tabıǵı-klımattyq jaǵdaı men mal jaıylymy, kórshi elderge eksporttaý syıymdylyǵy sekildi básekege qabilettiliktiń artyqshylyqtary saqtalýda. «Sondyqtan da, etti mal sharýashylyǵynyń eksporttyq áleýetin damytý agrarlyq bıznestiń ártaraptanýyna da septigin tıgizetin bolady», - deıdi A. Ahmetjanova.