Elimizdegi energııa kózderiniń otyn qoımalarynda 3,3 mln tonna kómir bar
«Bıylǵy jylytý kezeńi shtattyq rejımde ótip jatyr, tutynýshylar elektr jáne jylý energııasymen qamtamasyz etilgen. Respýblıka boıynsha iri tehnologııalyq ereje buzýshylyq tirkelgen joq», - dedi N. Noǵaev mınıstrliktiń keńeıtilgen alqa májilisinde.
Onyń aıtýynsha, tutastaı alǵanda, ortalyqtandyrylǵan jylýmen jabdyqtaý aımaǵyndaǵy barlyq jylý elektr ortalyqtary men qazandyqtar jylý energııasyn jylý jelilerine berýdiń temperatýralyq grafıkterin saqtap keledi. 2021 jylǵy 1 naýryzdaǵy jaǵdaı boıynsha energııa kózderiniń otyn qoımalarynda 3,3 mln tonna kómir jáne 106,2 myń tonna mazýt jınaqtalǵan, bul bekitilgen normalarǵa sáıkes keledi.
Budan bólek mınıstr kómirsýtegi boıynsha jer qoınaýyn paıdalaný, munaı ónimderin óndirý, gaz jáne gazben jabdyqtaý salasynda 2020 jyly 170 baqylaý is-sharasy ótkizilgenin aıtty.
«Jer qoınaýyn tıimsiz paıdalanǵany úshin 2020 jyly 694 mln teńgege aıyppul salyndy. 108 lıtsenzııa berildi, olar boıynsha lıtsenzııalyq alym somasy 8,5 mln teńgeni qurady (bıýdjetke kiris). Sonymen qatar 2020 jyly shıki gazdy alaý etip jaǵýǵa 208 ruqsat berildi jáne 10 gaz jelisi uıymy (barlyǵy 90 uıym) akkredıtteldi», - dedi N. Noǵaev.
