Elimizdegi eń joǵary jalaqyny munaı men gaz salasy uıymynyń basshylary alyp otyr
ASTANA. QazAqparat - Jumysshylardyń sıpattyq kásipteri jáne qyzmetkerlerdiń laýazymdary boıynsha ortasha aılyq jalaqysynyń kólemi týraly aqparat alý maqsatynda Ulttyq ekonomıka mınıstrligi Statıstıka komıteti ekonomıkalyq qyzmettiń jekelegen túrlerindegi kásiporyndar men uıymdarǵa birjolǵy zertteý júrgizgen. Zertteý qyrkúıek aıynda tolyq jumys istegen jumysshylardy qamtıdy. Bul týraly QR Ulttyq ekonomıka mınıstrliginiń Statıstıka komıtetinen habarlandy.
Komıtet taratqan málimetterge qaraǵanda, 2014 jyldyń zertteý nátıjeleri kórsetkendeı ekonomıkalyq qyzmet túrleri boıynsha jalaqy tóleýde jumysshylardyń kásipteri arasynda saralaý saqtalady. Sonymen qatar, basshylar sanatyna jatatyn qyzmetkerlerdiń ortasha jalaqysy biliktilik deńgeıi joǵarǵy mamandardyń jalaqysynan 1,9 ese, biliktilik deńgeıi orta mamandardyń jalaqysynan 2,3 ese jáne biliktiligi joq jumysshylar jalaqysynan 4,1 esege kóp bolǵan.
«Eń joǵarǵy jalaqy shıki munaıdy jáne tabıǵı gazdy óndirý salasynda jumyspen qamtylǵan uıymdardyń basshylarynda - 1 517 myń teńge tirkeldi. Bul kórsetkish kómir jáne lıgnıt óndirý salasyndaǵy basshylardyń ortasha alatyn jalaqysynan 2,9 ese jáne qurylys salasyndaǵy - 3,5 ese joǵary. Al áýe kóligi salasyndaǵy biliktiligi joǵary mamandary da joǵary jalaqy - 715-399 myń teńge alǵanyn atap ótken jón», delingen baspasóz baıanynda.
