Elimizdegi eń úzdik jol polıtseıi anyqtaldy
ASTANA. QazAqparat - Astanada Іshki ister mınıstrligi uıymdastyrǵan «Úzdik maman» jol-patrýl qyzmetkerleri baıqaýy qorytyndylandy, dep habarlaıdy QazAqparat tilshisi.
Qoǵamdyq tártipti kúzetý jáne jol júrisi qaýipsizdigin qamtamasyz etý - ishki ister organdarynyń basym mindetteriniń biri. Bul mindetterdi iske asyrýda jergilikti polıtsııa qyzmeti, sonyń ishinde jol-patrýl polıtsııasy saptyq bólinisteri úlken ról atqarady.
Atalǵan baıqaý osymen úshinshi ret ótkizilip otyr. Bul joly da qyzyqty, ózara básekelestik kúres negizinde órbidi. Baıqaýda qyzmetkerler ózderi kúndelikti jumys barysynda tikeleı qoldanatyn nemese qoldanýy múmkin 12 negizgi atalym boıynsha baq synady. Bul - normatıvtik-quqyqtyq aktilerdi bilýi, atys qarýy jáne qyzmettik ázirlik teorııasy, atys qarýy boıynsha praktıkalyq synaq, dene daıyndyǵy, kúrestiń áskerı tásilderi, saptyq baıqaý, ákimshilik praktıka,alǵashqy medıtsınalyq kómek kórsetý praktıkasy, joǵary belsendi qozǵalysy bar jol qıylystarynda qozǵalysty qolmen retteý praktıkasy, sondaı-aq kólikpen (jeńil, júk kóligi jáne mototsıklde) jyldamdyqqa manevrlar jasaý sııaqty synaqtar.
Baıqaýdy ótkizý barysynda barlyq qatysýshylar joǵary nátıje kórsetti. Áıtse de, baıqaýdyń aty - baıqaý, onda jeńimpazdar men jeńilgenderdiń bolýy zańdy. Sonymen, respýblıkalyq baıqaýdyń qorytyndysy boıynsha jol-patrýl polıtsııa qyzmetkerleri arasynda birinshi oryndy Shyǵys Qazaqstan oblysy ІІD JPQ JPP batalony qyzmetiniń ınspektory, polıtsııa leıtenanty Dastan Oshabaev ıelendi, ekinshi orynǵa Astana qalasy ІІD JPP polki qyzmetiniń ınspektory, polıtsııa leıtenanty Aldııar Jarylǵasynov laıyq dep tanyldy. Al úshinshi oryndy Almaty qalasy ІІD JPP polkiniń polıtseıi, aǵa serjant Baǵdat Ashekov qanjyǵasyna baılady. 
Eske sala keteıik, respýblıkalyq baıqaý 24 qyrkúıek kúni bastalǵan bolatyn. Oǵan barlyq óńirden 17 polıtsııa qyzmetkeri qatysty.
