Elimizdegi eń úzdik joǵary oqý oryndarynyń reıtıngi anyqtaldy
ASTANA. QazAqparat -Bilim sapasyn qamtamasyz etý boıynsha táýelsiz qazaqstandyq agenttigi (BSQTQA) elimizdiń eń úzdik joǵary oqý oryndarynyń ulttyq reıtıngin jarııalady.
Agenttik prezıdenti Sholpan Qalanova atap ótkendeı, bul ulttyq reıtıng «joǵary bilim berý sapasyn arttyrý quraly, bul JOO qyzmetiniń tıimdiligin salystyrýdyń belgili bir tetigi» jáne mektep túlekteri men jumys berýshilerdiń úzdik oqý ornyn tańdaýyna baǵyt-baǵdar beredi.
Bıyl segizinshi ret ótip otyrǵan reıtıngige elimizdiń 60 joǵary oqý orny qatysty. Úzdik bes joǵary oqý ornynyń kósh basynda, ıaǵnı birinshi orynda L.N. Gýmılev atyndaǵy Eýrazııa Ulttyq ýnıversıteti tur. Ekinshi orynda Ál-Farabı atyndaǵy Qazaq ulttyq ýnıversıteti, úshinshi jáne tórtinshi tuǵyrǵa M.Áýezov atyndaǵy Ońtústik Qazaqstan memlekettik ýnıversıteti men E.Bóketov atyndaǵy Qaraǵandy memlekettik ýnıversıteti ornalasty. Besinshi oryndy S.Toraıǵyrov atyndaǵy Pavlodar memlekettik ýnıversıteti ıelendi. Eń úzdik tehnıkalyq JOO bolyp, Qazaq-brıtan tehnıkalyq ýnıversıteti tanyldy.
Reıtıngti anyqtaý barysynda kúndizgi bólimde oqıtyn stýdentterdiń jáne bilim berý tapsyrysy negizinde oqıtyn stýdentterdiń úlesi, magıstranttar men Ph'D doktoranttar sany, bilim alýshylardyń oqý jetistikteriniń deńgeıi, halyqaralyq jáne respýblıkalyq deńgeıdegi jetistikteri jan-jaqty saralandy .
