Elimizdegi eń úlken sýly-batpaqty jer Almaty oblysynda ornalasqan
TALDYQORǴAN. QazAqparat - 2 aqpan — dúnıejúzilik sýly-batpaqty jerler kúni. Al elimizdegi eń úlken sýly-batpaqty jer Almaty oblysynda ornalasqan, dep habarlaıdy QazAqparat tilshisi.
Іle-Balqash memlekettik tabıǵı rezervaty baspasóz qyzmetiniń málimetinshe, 1971 jyldyń 2 aqpanynda Iran eliniń Ramsar qalasynda sýly-batpaqty aımaqtardy qorǵaý maqsatynda «Ramsar konventsııasy» bekitilgen bolatyn. Qazirgi tańda bul konventsııaǵa 170 memleket birikken.
Qazaqstan Ramsar Konventsııasyna 2007 jyly múshe boldy. Elimizdegi 10 sýly-batpaqty atyrap Ramsar konventsııasy tizimine enip, halyqaralyq mańyzǵa ıe bolyp otyr. Solardyń eń irisi Almaty oblysyndaǵy Іle atyraby men Balqash kóliniń oń jaq bóligi. Onyń aýmaǵy 1 mln gektarǵa jýyq.
2018 jyly osy sýly batpaqty aımaqty aman saqtap qalý maqsatynda Іle-Balqash rezervaty quryldy. Qazirgi tańda rezervat aýmaǵy memleket qorǵaýyna alynyp, ósimdik jáne janýar qoryn molaıtý jumystary júrgizilip jatyr. Aldaǵy ýaqytta bul aımaqta joǵalyp ketken Turan jolbarysyn jańǵyrtý jospary tur.
2023 jyly bul jerge Turan jolbarysyna uqsas Amýr jolbarysyn jiberý kózdelip otyr.
