Elimizdegi eń tanymal 25 sarapshy jastarǵa onlaın bilim beredi

NUR-SULTAN. QazAqparat – «Jańa jaǵdaıdaǵy jastar: is-qımyl kezeńi» respýblıkalyq onlaın jastar jobasy aıasynda elimizdiń eń tanymal 25 sarapshysy jastarǵa onlaın bilim beredi. Bul týraly QR Aqparat jáne qoǵamdyq damý mınıstrliginiń jastar jáne otbasy isteri komıtetiniń tóraǵasy Shahmardan Baımanov málim etti, dep habarlaıdy QazAqparat tilshisi.

«Jańa jaǵdaıdaǵy jastar: is-qımyl kezeńi» respýblıkalyq onlaın jastar jobasynyń eń mańyzdy baǵytynyń biri – onlaın bilim. Elimizdegi eń úzdik degen 25 spıker (sarapshylar men koých-trenerler) jastarǵa bilim beredi. Bul jerde bes baǵytty tańdap otyrmyz. Atap aıtqanda «tulǵalyq taný», «volonterlik qyzmet», «azamattyq belsendilik», «aqparattyq tehnologııalar» men «jastar belsendiligi» baǵyttary tańdap alyndy. Bul taqyryptardy jaıdan-jaı alǵan joqpyz. Bul - jastardyń talǵamyna, qazirgi trendterge negizdelgen taqyryptar, osy daǵdylardy bizdiń úzdik koých-trenerler oqytady», - dedi Shahmardan Baımanov OKQ-da ótken baspasóz máslıhatynda.

Komıtet basshysynyń aıtýynsha, koých-trenerler ár baǵyt boıynsha 200 qatysýshyny oqytady.

«Sonymen qatar, ashyq pikir formatynda onlaın dıalog qurǵymyz keledi. Oǵan laýazymdy tulǵalar men belgili qoǵam qaıratkerlerin shaqyrý josparlanǵan. Onlaın dıalog tok-shoý formatynda uıymdastyrylady. Jastardy qatty mazalap júrgen bes taqyryp tańdap alyndy. Bul jerde turǵyn úı, bilim, jumyspen qamtý, aqparattyq tehnologııalar, belsendilikti shyńdaý sekildi taqyryptar bar. Osy salanyń mamandary óz oı-pikirin usynady», - dedi ol.