Elimizdegi eń «aqyldy» qalalar anyqtaldy

NUR-SULTAN. QazAqparat – Qazaqstanda «aqyldy» óńirlerdiń reıtıngi jasaldy. Bul týraly QazAqparat QR Tsıfrlyq damý, ınnovatsııalar jáne aeroǵarysh ónerkásibi mınıstrligine silteme jasap habarlaıdy.

Zertteýge 14 oblys ortalyǵy men respýblıkalyq mańyzy bar 3 qala qatysty. Baǵalaý 11 túrli baǵyt pen 80 kórsetkishten turatyn «Aqyldy qalalar» etalondyq standarty negizinde júrgizildi. Olar densaýlyq saqtaý, bilim berý, turǵyn úı-kommýnaldyq sharýashylyǵy, kólik, ekologııa, áleýmettik jáne t.b. salalardy tsıfrlandyrý bastamalaryna qatysty.

QR Tsıfrlyq damý, ınnovatsııalar jáne aeroǵarysh ónerkásibi vıtse-mınıstri Abylaıhan Ospanovtyń aıtýynsha, reıtıng óńirlerdi «tsıfrlyq» belsendilikti arttyrýǵa yntalandyrý úshin qajet.

Atap aıtqanda, reıtıngti qurý kezinde ákimdikterdiń memlekettik qyzmetterdi avtomattandyrýy, turǵyn úılerge «aqyldy» esepteýish quraldarynyń ornatylýy, tirkelgen startaptardyń sany, zııatkerlik kólik júıesiniń engizilýi, qoǵamdyq kóliktiń baǵyt-baǵdaryn monıtorıngteý jáne t.b. arnalǵan qosymshalardyń qoljetimdiligi nazarǵa alyndy.

Vıtse-mınıstrdiń atap ótýinshe, bul reıtıng óńirlerdiń «tsıfrlyq» belsendiligin arttyrýǵa baǵyttalǵan.

«Tsıfrlyq Qazaqstan» memlekettik baǵdarlamasy eki jyl buryn qabyldanyp, óńirlerde birqatar joba júzege asyryldy. Árıne, olardyń keıbiri tıimdi bolsa, keıbiriniń nátıjesi tómen boldy. Tsıfrlandyrý salasyndaǵy jalpy jaǵdaıdy kórsetý úshin biz osy reıtıngti ázirledik. Bul sondaı - aq óńirlerdiń «tsıfrlyq» damýyn yntalandyrý úshin qajet», - dep atap ótti A.Ospanov.

Reıtıngte birinshi orynǵa Nur-Sultan qalasy ıe bolsa, ekinshi oryndy Almaty, úshinshi oryndy Oral qalasy ıelendi.

Reıtıng jyl saıyn qurylady. 2019 jylǵy reıtıngtiń nátıjesimen https://egov.kz/cms/ru/smart-cities siltemesi arqyly tanysa alasyzdar.